Dili – Selebrasaun solenidade Don Bosco nian iha tinan ne’e grandiozu tebes, basá Don Bosco nia Susesór X rasik marka nia prezensa, Pe. Ángel Fernández Artime ne’ebé vizita ita-nia Rain husi loron 30 Janeiru to’o 5 Fevereiru. Haree ba prezensa husi ema wain hahú husi ukun-na’in sira, Na’i Prezidente Repúblika no membru Governu balun, nune’e mós eis membru governu sira hanesan Sr.Taur Matan Ruak, nu’udar antigu alunu mós, hatudu katak Don Bosco nia prezensa iha duni impaktu ba nasaun ki’ik-oan ida-ne’e, “Don Bosco Aman no Mestre Juventude nian”, joven tempu ida nian no joven ohin nian. Haree mós ba koru de’it ne’ebé kompostu husi ema tokadór/a sira de’it mak na’in 80, mai husi foin-sa’e sira eskola S. Pedro, seminarista diosezanu sira, no elementu Forças Armadas FDTL, sai orkestra boot ida dirije husi Pe. Adérito Costa SDB, bele mós dehan katak Don Bosco hatene envolve ema hotu atu hasai sira-nia talentu hodi hahí Na’i.

Iha ninia programa, Reitór-Mor hasoru no sei hasoru grupu oioin Família Saleziana nian, maibé ohin, 31 Janeiru, Don Bosco nia susesór halibur Família tomak ho nia hadulas Na’i nia Altár atu agradese Na’i Maromak ba “prezente Don Bosco nian iha Igreja no iha mundu. Amu-Papa S. João Paulo II ne’ebé proklama Don Bosco Aman no Mestre Juventude universál nian, no ha’u hanoin, Don Bosco ohin haksolok tebes iha momentu ida hanesan ne’e”, nia dehan. Reitór-Mor ne’ebé fó hanoin katak loron ne’e aniversáriu Don Bosco nia mate ba dala 130, subliña liu liafuan “servisu”, “serví” ne’ebé ita halo ita sai ida de’it nu’udar Família Saleziana nune’e mós autoridade sira: “Ita-nia Família Saleziana nune’e mós autoridade sira iha finalidade atu serví povu, joven sira”.

Pontu daruak nia omilia mak agradese ba misionáriu sira ne’ebé to’o iha Rai Timor ho “Karizma Don Bosco nian”, depoizde Maromak nia Liafuan ne’ebé to’o antes liután. Buat ne’ebé akontese mak “Rai Timor nian mak rai di’ak liu ba karizma salezianu”, Reitór-Mor hatutan. Husi misionáriu dahuluk sira ita deve iha Timor tomak prezensa wain ita-nia Família Saleziana: “Ha’u hakarak dehan katak tebes duni, povu simu ho fuan Don Bosco ne’ebé mai ho sira”. Haree ba ida-ne’e bele dehan katak “ita iha prezente furak liu no futuru nakonu ho esperansa atu serví labarik no foin-sa’e sira husi rai abensoada ida-ne’e”, Amu Ángel taka nia omilia.

Amu Ángel la subar ninia ksolok boot tanba nia haree katak Kreda nakonu ho foin-sa’e sira no ema adultu, la’ós de’it horisehik iha triduu maibé liuliu ohin.

Nune’e, mensajen ba joven sira:

“Joven sira iha nesesidade atu koñese adultu sira, inan-aman ne’ebé halo dalan iha sira-nia oin. Harre joven barak ko’alia kona-ba esperansa boot no futuru boot iha mundu ne’e. DonBosco halo buat hotu posivel atu prepara labarik no foin-sa’e sira ba vida… Maibé Don Bosco la halo de’it servisu sosiál. Don Bosco lori, tempu hanesan, labarik no foin-sa’e sira atu koñese Jezús Kristu. Furak liu haree joven sira ne’ebé prepara ba vida, maibé Maromak mós iha Ninia fatin iha sira-nia fuan. Dala ida, Papa Bento XVI dehan ba joven sira: ‘Ha’u-nia joven doben sira, imi iha direitu atu buka ksolok, ksolok ida kle’an, auténtika, la’ós momentu ida nian. Ha’u tenke dehan ba imi nia naran sá. No Amu-Papa Bento dehan: Nia naran mak Jezús Kristu’. Iha Don Bosco nia naran ha’u tenke hateten hanesan ohin ba imi hotu.  Ita tenke halo buat hotu no serbisu atu sai di’ak atu buras, maibé Naran ne’ebé bele fó ksolok mai ita mak nafatin Jezús Kristu”.

Ikus, mensajen ba Família Saleziana:

“Ha’u-nia Família Saleziana doben, ha’u konvida imi atu halo mós buat ne’ebé ita-nia Amu-Pap husu atu halo, Papa Francisco. Ita  tenkee sai Igreja ida no komunidade la’ós ho odamatan taka metin. Ita tenke sai Família Saleziana no Don Bosco nia belun hotu ho odamatan sira no fuan nakloke. Ita barak no ema tenke sente katak sira bele mai hasoru imi. No ita hotu komunidade ida  ho karizma salezianu atu serví ita-nia povu, atu horik iha ema nia leet, ema ne’ebé presiza ita hotu. Dala ida tan hnesan Don Bosco ita tenke tulun  atu prepara ba moris maibé tempu hanesan prepara ba Jezús. Boas festas de Dom Bosco e que Deus vos abençoe!”

Selebrante prinsipál mak Reitór-Mor no konselebra husi amlulik salezianu sira, amlulik diosezanu antigu alunu balun, no prezente mós iha Eukaristia Kreda Dili nia ulun, “irmão salesaino”, Mons. Virgílio do Carmo da Silva SDB, selebra Eukaristia hodi hahú ho agradesimentu no espresaun ksolok nian ba prezensa hotu-hotu.

Remata Eukaristia, Amu Ángel depoizde halo foto ho grupu oioin, prosede ba Uma-Fukun Salezianu, hodi kontinua ho almosu konfraternizasaun no konvíviu sira.