Laga – Liu tiha Intalasaun  Pároko foun iha Baucau, Parókia Laga husik mamuk deit, maski Pe. Rui Gomes, SDB to’o iha 11 de Janeiru 2018, maibe nia dehan “ha’u seidauk bele, …” Nune’e, sarani sira ohin, 28 Janeiru 2018, haksolok tebes tamba iha ona Amu Pároko no sente katak la mesak ona, iha bibi atan ida atu tau matan ba sira.

Antisipa misa Don Bosco relasiona ho Reitor Mor nia visita. Nune’e, Misa hahú iha tuku 09:00 remata iha tuku 12:30. Iha Misa ne’e amu Pároko foun fo omilia haktuir Don Bosco nia liafuan ne’ebe dehan “salesiano wainhira hamutuk ho Foinsa’e sira, lato’o deit atu ita dehan hau hadomi o, maibe halo sira sente katak ita hadomi duni  sira. Sira tenki sente sela’e ita hader sedu no toba tarde iha kalan ne’e la iha folin.

Sai Pároko mos une’e, lato’o deit atu koalia maibe haka’as-an hodi halo karidade, atu sarani sira sente duni katak Amu Pároko hadomi sira, ne’e mak domin ne’ebe loos. Hadomi hodi halo karidade no sakrifisio atu bele manan klamar liu-liu sira ne’ebe kiak no abandonadu.

Iha misa ne’e mos amo Pároko tuan, Pe. Manuel Ximenes SDB, hatoo nia agradesemento ba Parokiano sira, Leaders komunitario sira, Goveno, Militar, Sivil no grupos oioin iha Parokia ne’e; husi Baguia too laga, maibe FMA sira la tama iha lista agradesementu nian maski nune’e la taka FMA sira nia fuan no domin ba aktividades Parokia nian liuliu ba foinsa’e sira nia salvasaun.

Liu tiha ne’e, amo Bispo Don Basilio do Nacimento, Bispo Baucau nian dehan:” Pe. Manuel sai ona husi Laga la mete tan buat ida iha Laga ne’e, se buat ruma la lo’os karik imi iha Pe. Rui. Se hakarak atu konfessa nia bele atende.”

Tuir mai han hamutuk, kanta, dansa, fo prezente too tuku 16:00 lorokraik. Labarik sira husi Orfanato mos apresenta dansa bemvindo ba Pe. Rui no agradese ba Pe. Manuel.

 

(Onesiana Baptista)