Sidade Vaticano – Funu hasoru aat mak difisil liu hotu atu kombate, maibé nia mak odamatan mesak ne’ebé lori ba dame, ida loos no kle’an. Amu-Papa hateten ida-ne’e ohin iha orasaun Angelus iha Prasa S. Pedro nakonu ho ema lubun boot.

Francisco komenta leitura sira domingunian no esplika signifikadu tuir Jezús : “Tuir Jezús la signifika halo marxa ida triunfu nian! Signifika fahe ninia domin nakonu ho laran-sadia, tama iha ninia obra boot laran-sadia nian ba ema ida-idak no ba ema hotu”. Domin ida ne’ebé liuhusi krús, no hakribi soin materiál sira : “ Jezús nia dixípulu hakribi soin hotu tanba nia hetan ihaNia Soin boot liu hotu, iha ne’ebé soin seluk simu husi nia valór no signifikadu nakonu: ligasaun familiár sira, serbisu, soin kulturál no ekonómiku sira… Ema sarani ida haketak an husi buat sira ne’e hotu  no hetan buat hotu iha lójika Evanjellu nian, lójika domin no servisu nian”.

Hafoin, hodi refere ba Evanjellu ne’ebé ko’alia kona-ba ai-knanoik liurai ne’ebé bá funu Amu-Papa hateten : “ Iha ne’e Jezús la hakarak enfrenta tema funu nian, ne’e ai-knanoik de’it. Maibé, iha momentu ne’ebé ita harohan maka’as ba dame, Na’i nia Liafuan ida-ne’e kona tebes ita, no iha nia esénsia dehan mai ita: iha funu ida kle’an liu ne’ebé ita tenke kombate, hotu-hotu! Ne’e mak desizaun forte no barani nian atu hakribi aat no ninia babeur hotu no hili di’ak, pontu atu selu ho an rasik”.

To’o iha ne’e nia temi kona-ba situasaun iha Médiu-Oriente: “Buat ne’e husu, entre buat seluk, dehan lae ba ódiu entre maun-alin sira no ba lia-bosok sira ne’ebé uza, ba violénsia iha ninia forma hotu, ba aumentu kilat sira nian no sira-nia komérsiu ilegál”.

Amu-Papa hakilar mak’as hasotu komérsiu ilegál kilat sira-nian ne’ebé haboot funu iha parte barak mundu nian.

Amu-Papa nia prasaun taka no hanoin kona-ba velada no pedidu foun atu kontinua orasaun : “horikalan ita halo velada hodi entrega ba ninia intersesaun ita-nia orasaun ba dame iha mundu, ho modu espesiál iha Siria no Médiu-Oriente tomak. Oras-ne’e ita invoka nia nu’udar Liurai-Feto Dame nian. Liurai-Feto Dame nian harohan mai ami. Liurai-Feto Dame nian harohan mai ami”.