Dili – Ho ksolok boot ohin Eskola Maria Auxiliadora selebra festa S. Fransico de Sales, mak  doutor domin boot no laran midar nian. Iha ninia hanorin sira koalia kona ba umanizmu sarani nian, hahu husi fuan no iha nia finalidade  loke nia ho kbiit hotu ba Maromak nia domin. Don bosco hili husi santu ne’e laos deit patronu ba ninia obra sira maibe nudar paradigma ba ninia sitezi Espiritual pedagojia to’o identifika nudar  Salesiana ninia familia relijiosa ne’ebe nia funda ba foin sae sira nia edukasaun. Tempu hanesan misa  abertura ano escolar ba tinan 2018 nian; katak loke ho Maromak , taka mos ho Maromak tanba Maromak deit mak buat diak tomak nia hun no nia nai. Eukaristia Santa ne’e selebra husi Padre Mario do Rosario SDB  iha parokia Maria Auxiliadora; hodi hanoin mos komemorasaun ita nia inan Maria Auxiliadora.

Iha Padre nia homilia, Padre foti  Saun Francisco nia lia fuan ne’ebe dehan: sai laran midar hanesan “bani ben kanuru ida dada liu lalar duke tua sin bidon ida ”.  padre dehan tan : atu sai laran midar, laran diak no laran luak, ita presiza halo relasaun ho Maromak no tenke liga metin iha Maromak atu fo naroman ba ema seluk. Ita nia relasaun ho Maromak tenke halo bebeik no nafatin atu nune’e sai manas nafatin. Ita nia relasaun metin, ita nia domin mos sai metin liu tan.atu halo relasau no domin meti ho Maromak mak liu husi : Rona Maromak nia lia fuan iha Misa,partesipa didiak iha misa, iha Orasaun loron-loron nian mak relasaun simples nebe ita labarik sira halo ba Maromak. Ita nia domin metin ba Maromak tempu hanesan ita nia domin sai klean liu tan ho ita nia an rasik no mos ba ema seluk. Padre tenik tan imi la bele sai moruk hanesan ai-dila tahan no ai moruk ne’ebe ema tauk atu han; tenke sai midar hanesan bani ben no masin midar.

Nune’e husi mensajen Saun Francisco de Sales nian ne’e Padre husu ba labarik sira husi 9 Ano to’o Pre-Escolar atu halo ligasaun (relasaun) diak no hadomi Maromak no maluk sira atu nune’e Maromak halo ita nia fuan no laran sai midar hanesan bani ben atu ema fasil liu atu hakbesik no koalia ho ita, iha fatin nebe deit ita iha. La bele halo oin sin, oin, moruk, no oin hirus maibe presiza hamnasa midar no oin midar.atu nune’e it abele moris tuir ezemplu saun Francisco nia hanorin diak sira.

Liu husi saun Francisco no Maria Auxiliadora eskola nia mahein  sira nia harohan daet atu tulun labarik sira  bele moris tuir Santo boot ne’e nia hanorin sira kona karidade no domin, hodi tau iha sira nia moris nudar estudante nebe diak sai no Maria Auxiliadora nia oan doben sira.

(Grinalda da Costa)