Balide / Dili – Loron 22 Janeiru 2017, haksolok hamututk ho foin-sa’e sira ho loron festa Beata Laura Vicuña nian ne’ebe ami selebra ho foin-sa’e sira Antiga/o alunos, eskola Kristal, Komunidade Edukativa no mos misa abertura ba Kursu Computador Balide tinan 2018 nian.

Molok atu too ba festa  ne’e, alunos hotu koñese uluk Laura nia moris liu husi konkursu no mos filmajen Laura nian ne’ebe sai signifikativu liu ba foin-sa’e ne’ebe  ba dala uluk rona no hare kona Laura.

Molok atu tama iha selebrasaun Eukaristia lokraik nian formande no menina kolejiu sira aprezenta ba foin-sa’e sira  no komunidade Edukativa  sira drama badak Laura nian, ne’ebe Laura rasik  mak aprezenta nia istória ba foin-sa’e sira ne’ebe partisipa iha misa lokraik nian.

Laura nia mensajen ne’ebe haktuir ba foin-sa’e sira mak:

• Hakarak hadomi no serbi deit Maromak iha moris tomak
• Hakarak mate molok halo sala. Hakarak hadera an ba buat hotu ne’ebe haketak hau husi ita Boot
• Hau hakarak fo hau nia an tuir hau nia hatene atu ema barak bele hatene no hadomi Ita Boot.

Iha kolejiu nia mos aprende valor furak amizade nian, Laura dehan: ‘ ema ida hetan belun diak ida,  nia hetan osan mean’.

Laura nia moris santidade nian ba foin-sa’e sira mak:

Santidade mak prezente ne’ebe  Maromak fo ba ita iha batismu, maibe presisa ita nia kolaborasaun ba Ninia grasa.  Laura iha konvinsaun ida ne’ebe metin ba nia moris mak:

• Sente Maromak Nia prezensa iha momentu ksolok no susar nian.
• Nai nia prezensa fo folin boot liu husi Orasaun, serbisu, estuda ka halimar. Buat hotu ne’e nia segredu mak halo ho domin no responsabilidade.
• Hau nia belun diak mak Jezus no Maria.

Hotu tiha drama badak hahu kedas ho Eukaristia Santa ne’ebe preside husi Padre João Boavida sdb.  Iha omilia padre hatutan deit  katak Laura mak foin-sa’e ida ho idade ki’ik maibe nia deskobre ona Maromak  Nia grasa ne’ebe akompaña nia atu bele manan SANTIDADE ida.

Ikus liu taka ho mensajen husi Amu-Papa S. João Paulo II ba loron mundial Joven sira nian, ne’ebe dehan:

“Ba joven sira , imi lalika hein to’o imi sai ferik ka katuas hodi bele lao iha dalan Santidade nian. Santidade mak joven nafatin. Santidade laiha idade”.

(Ines Bartolo Freitas)