Husi Irmán Alma Castagna

Dili – Tuir buat ne’ebé Amu-Papa propoin ba mundu tomak, sábadu 7 Setembru loraik, husi tuku 18.30 to’o tuku 21.00, ami-nia komunidade hamutuk ho komunidade canossiana organiza momentu orasaun nian ba rai Síria iha ami-nia Gym. Amu Rodrigo Bilbao, enkaregadu ba Vatikanu iha Timor-Leste, marka prezensa hamutuk ho ami-nia formande sira, irmán canossiana nia interna sira, foin-sa’e ruma husi oratóriu no kursu, no ami-nia viziñu sira: ferik, foin-sa’e no mós labarik sira ne’ebé mai ho aman-inan sira.

Ir. Alexandrina Pinto, diretora komunidade nian, hahú hodi fó hanoin ba sira ne’ebé partisipa katak tinan 14 ita Timor oan sira moris iha situasaun hanesan no mundu tomak hatudu ninia solidariedade liuhusi orasaun, demonstrasaun, jejun no manifestasaun oioin, nune’e ita sente responsabilidade atu agradese ba buat ne’ebé uluk simu liuhusi orasaun ida ne’e.

Tuir ir. Alexendrina, iha oportunidade atu haree fali Amu-Papa nia Angelus domingu kotuk nian no imajen ruma husi Síria ne’ebé halo partisipante sira hakle’an liután situasaun iha rai ne’ebá.

Orasaun fahe ba momentu 5: hahú momentu ida-idak hodi sunu insensu, hafoin lee Maromak nia Futar Lia, hatán ho orasaun ka kantu eh salmu, rona reflesaun badak ruma no reza ba Na’in Feto. Hotu-hotu reza no oferese sira-nia jejun ho sentidu maka’as, tan ne’e, bainhira orasaun hotu ona, viziñu balun hakbesik irmán sira hodi husu se loron tuir mai mós ita sei reza ba Síria. Ita konvida sira atu kontinua iha uma, hodi reza iha família hamutuk ho oan sira no la haluha povu sirianu nia terus.

Amu Rodrigo manifesta ninia ksolok atu haree katak ema simu ho disponibilidade boot Amu-Papa nia proposta no nia hein katak sarani sira iha ne’e bele hatán nafatin ba Amo Papa Fransisku nia liafuan sira.