Laga – Iha loron sábado dia 20 Janeiro, ami selebra festa komunidade Beata Laura Vicunha nian, hamutuk ho inan-aman sira. Bainhira sira to’o hotu mai, ami hahu ho fomasaun ida ne’ebe dirije husi Me. Angelita Gomes, FMA (diretora) no Me. Ermelinda da Silva, FMA (vigaria). Me. Angelita hato’o kona ba inan-aman nia responsabilidade no kna’ar atu tau matan ba oan sira hodi servisu hamutuk ho madre sira. No Me. Ermelinda  hato’i ba inan, Aman kona ba regulamentu ba oan sira iha komunidade ne’e.  Ho regulamento ne’e hanorin no tulun labarik sira atu sai labarik ne’ebe diak, nakonu ho responsabilidade, badinas servisu no hatene eduka sira nia-an, nu’udar labarik ne’ebe diak iha komunidade no iha sosiedade.  Hatene rai-an hanesan iha regulamentu balun ne’ebe dehan: hatais tenke naruk atu sira bele reserva-an hodi mantein no fo valor ba ita nia kultura, tanba ohin loron ema la fo ona importansia ba ita nia kultura.

Tuir mai Eukriatia, selebra husi Pe. Rui Gomes, SDB (la kleur tan sai Pároko iha Laga) ne’ebe iha nia homilia dehan; atu manan ksolok lalehan nian, presiza halo sakrifisiu, nune’e mos ita nia moris ka Laura nia moris atu manan ksolok ne’ebe loos presiza liu dalan sakrifisiu nian, terus no halo karidade ba ema seluk, atu manan Kristu nia domin. Depois de misa, ami han hamutuk no atu haksolok ka harame liu tan festa ami remata ho atraksi badak ida kona ba Laura nia moris hodi komprimenta komunidade no familia sira.

Iiha segunda feira, dia 22 mak ami selebra Eukaristia hamutuk ho estudante sira, Misa iha Parokia, Pe. Aquiles Soares, SDB mak selebra, nune’e iha nia homilia dehan; santidade la to’o deit ba padre no madre sira, vale ba ema hotu, maibe presiza ema ne’ebe hakarak fo sasin ba Maromak nia domin, liu husi ninia moris. No ami remata festa hodi fo merenda ba estudante hotu.

(Simoa Correia)