«Imi bá… sai Ha’u-nia sasin to’o mundu nia rohan»… «atu sira bele hetan moris no moris naresin»

 

Dili – Loron ksolok boot ba irmán FMA sira Inspetoria TIN ho presente misionária foun, irmán María Carmen Ramos Bravo, to’o iha Jakarta loron 30 Agostu no iha Dili horisehik, loron 6 Setembru 2013. Nia orijen española no halo ona esperiénsia misionária iha Moçambique ba tinan sanulu-resin-tolu. Oras ne’e nia simu obediénsia atu sai misionária iha inspetoria Timor-Indonesia.

 

Ba Inspetoria TIN ne’ebé selebra tinan 25 prezensa FMA nian mak prezente ida furak liu no hatudu Madre Jerál nia domin. Molok ne’e, ba selebrasaun tinan 25 Inspetoria fó misionária na’in rua, irmán Úrsula no irmán Fernanda no agora nia simu fali ida husi Institutu. Ne’e mak hanaran universalidade Institutu ida ho identidade misionária, ne’ebé hatudu ba beibeik komuñaun no partilla iha nia laran no mós iha Kreda universál. Ne’e mak Don Bosco nia mehi boot. Bainhira funda Institutu iha 1872 iha nia fuan mehi misionáriu ne’ebé nia iha buras ba beibeik to’o konkretiza ho espedisaun dahuluk tinan 1875 nian, ba Amérika Latina. Madre Mazzarello mós daet ho entuziazmu hanesan, hakerek ba padre Giovanni Cagliero iha 1876 atu bolu lalais sira bbá iha misaun no nia rasik mós hakarak sai misionária. Husi tempu ne’e, husi jerasaun ba jerasaun povu sira la kuran misionáriu sira haklaken-na’in Maromak nia Evanjellu nian hodi obedese Na’i nia mandatu: Imi bá… sai Ha’u-nia sasin to’o mundu nia rohan».

Irmán Carmen, ne’e mak naran bolu nian loroloron, husi kedas inísiu ninia vokasaun alimenta hakaran atu sai misionária. Sei novísia nia husu ona atu ba rai misaun. Hafoin primeira profisaun nia husu fali, sai irmán perpétua husu tan hafoin liutiha tinan 12 profisaun nian, nia bele realiza mehi ne’e iha Áfrika no agora atu hahú misaun iha nusa ki’ik-oan Ázia nian. Iha nia dalan konsagrada nian pasajen Evanjellu ne’ebé gia nia mak ida S. João nian ne’ebé dehan “Se fini ida, monu iha rai, la mate, hela mesak; maibé se nia mate, sei fó fuan barak. Se mak hadomi nia moris rasik sei lakon, se mak lakon nia moris iha mundu ne’e, sei hetan fali iha moris rohan laek” (Jo 12, 20-23). Moris mak prezente ida ita simu no atu fó, no hodi fó, hosi saran an mak moris ne’ebé bele hakbarak no hakbarak iha abundánsia.

Redasaun fó benvinda ba irmán Carmen, no halo votus atu iha fatin ne’ebé de’it Na’i haruka ita bá, loos duni, moris bele natubu no naresin liuliu ba foin-sa’e sira.