Venilale – Iha neon ho laran ida de’it iha komunidade Venilale, membru sira eskola katólika nian, Família Saleziana, ohin  hadulas Na’i nia Altár atu selebra hamutuk festa Beata Laura Vicuña nian, nune’e mós loke tinan letivu eh eskolár 2018.

Iha okaziaun ne’e, molok Missa, Ir Alexandrina Pinto hetan knaar atu aprezenta figura “Reitór-Mor” nian, nu’udar Don Bosco nia susesór, no oras-ne’e nia mak Padre Ángel Fernández Artime no sei mai vizita Timor-Leste iha loron 30 Janeiru to’o 3 Fevereiru.

“Hola parte ba Família Saleziana ne’ebé boot tebes presiza iha sentru vitál ida ne’ebé atualiza referénsia ba Don Bosco, ba misaun komún no espíritu hanesan. Sentru ne’e, ne’ebé garante unidade tuir Don Bosco nia hanoin mak Reitór-Mor” (Kf Carta de Identidade da Família Salesiana, art.13). Iha nia, ita hotu rekoñese ninia knaar  tolu: Susesór Don Bosco nian, Aman ba Família Saleziana no sentru unidade família. Ba nia knaar institusionál atu admiti ba Família Saleziana Grupu sira ne’ebé husu, tuir kritériu sira ne’ebé estabelese ona.

“Liuhusi ninia ezemplu no majistériu [eh hanorin], nia harii unidade no asegura atu, iha vokasaun espesífika sira, bele iha fidelidade ba espíritu no iha koordenasaun iha insiativa sira. Reitór-Mor ezerse ministériu ne’e ho Don Bosco nia paternidade: atitude ne’ebé husu komprensaun no laran-di’ak, atensaun ba grupu ida-idak ninia kreximentu, gia iha fidelidade ba karizma, empeñu ba fekundidade vokasaun saleziana nian iha ninia espresaun sira hotu, hanesan Don Bosco rasik husik iha ninia hakerek:  «Imi-nia Reitór sei tau matan ba imi no ba imi-nia salavasaun rohan-laek»” (Kf Carta de Identidade da Família Salesiana, art.13).

Missa selebra husi Pe. Júlio Mota SDB. Iha ninia omilia nia salienta nesesidade husu Maromak nia tulun mai ita hotu “edukadór/a sira no estudante sira, inan-aman sira” atu ida-idak hala’o ninia knaar didi’ak iha tinan eskolár foun”. Iha ne’e ita iha modelu sira, Don Bosco, Domenico Savio, Laura Vicuña.

Ohin ita-nia selebrasaun propoin Laura Vicuña, ne’ebé to’o ona iha finalidade ikus edukasaun saleziana nian katak “santidade”. Beata Laura aprende santidade iha koléjiu no eskola FMA sira-nian, ne’ebé sintetiza iha saran nia moris ba nia inan nia konversaun. Iha-ne’ebá nia hala’o knaar hotu ho pontualidade: “haksolok iha esperansa, tahan buat hotu iha terus laran no la kole atu harohan”, hanesan S. Paulo hakerek iha leitura ohin nian. Laura haksolok iha esperansa, ba tempu “futuru” katak buat ne’ebé nia hein sei sai tuir duni, nune’e mak nia “tahan iha ninia terus ne’ebé Manuel Mora kauza”. Nia “hamnasa midar iha terus” no iha “tempu baibain nian” (prezente) nia “harohan hodi la kole”. Padre Júlio konvida atu ita hotu, padre, madre, profesór/a sira, estudante sira “sai ema esperansa nian, moris iha perseveransa no iha ksolok” iha ida-idak ninia knaar.

Molok festa ne’e, durante “buonanotte” iha koléjiu, kalan-kalan Irmán sira aprezenta Laura nia moris ba feto-raan sira, hodi koñese di’ak liután nia no bele foti nia nu’udar modelu. Iha komunidade festa sei kontinua iha domingu 21 kalan ho aprezentasaun husi grupu ida-idak Laura nia moris nia aspetu ida hanesan nia domin ba Eukaristia, ba Maria, amizade, nst.