«Lahó koneksaun ho Jezús, ita ikusmai mout iha ita-nia ideia sira, ita-nia mehi sira, ita-nia fiar no ita hakonu an ho umór lad’iak».

RV – Iha ninia vizita ba rai Chile no Peru (15-22 Janeiru), Papa Francisco vizita ko’alia ba grupu oioin, Ba joven sira, Papa Francisco uza linguajen nativu dijitál sira-nian atu komunika ho sira nesesidade atu horik hamutuk ho Jezús. Nia uza ezemplu rede nian, ko’alia kona-ba “password”, maibé oferese konsellu sira mai husi santu Cile Alberto Hurtado ninia hanorin sira. Amu-Papa hasoru joven sira Cile nian iha Santuáriu Maipù, fatin istóriku kultu dedika ba Na’i-Feto Virjen Karmelu nian no símbolu independénsia País nian, tanba iha ne’e mak iha tinan ‘800 sira Cile halakon español sira nia ezérsitu.

Papa Bergoglio hetan akollida husi ema husi idade hotu, ne’ebé kaer no doko bandeirola no kartás krús nian ho motto «Mi paz les doy».

Amu-Papa subliña katak joven sira, «gosta aventura no dezafiu sira». Nia hatutan, «imi sai bosan bainhira la iha dezafiu ne’ebé estimula imi. Ida-ne’e bele haree momoos bainhira akontese dezastre naturál: imi iha kapasidade boot atu mobiliza an, ne’ebé revela imi-nia fuan nia jenerozidade». Papa Francisco ko’alia mós kona-ba domin ba Pátria: «Estrada ba orizonte tenke halo ho ain iha rai. No hahú ho ó-nia ain iha rai pátria nian. No se ó la hadomi ó-nia rain, ha’u la fiar katak ó sei hadomi Jezús no hadomi Maromak».

Amu-Papa ko’alia kona-ba ninia esperiénsia bispu nian: «Iha ha’u-nia servisu espiskopál ha’u deskobre katak iha ideia barak, barak tebes, iha foin-sa’e sira nia fuan no neon. Sira lahakmatek, buka-na’in, idealista. Problema mak ita adultu sira-nian ne’ebé, dalabarak, ho oin matenek nian, ita dehan: “Nia hanoin nune’e tanba nia joven, lakle’ur nia sei sai tasak”».

Sai tasak, «signifika sai boot no halo mehi sira sia boot, keta hatun vijilánsia no keta husik ema sosa imi ba osan uitoan. Bainhira “ema boot” ruma hanoin ida-ne’e imi labele rona nia! Parese sai tasak katak aseita injustisa, fiar katak ita labele halo buat ida, katak buat hotu baibain halo nune’e. Ida-ne’e korrupsaun».

Ba razaun ida-ne’e Amu-Papa hakarak halo sínodu joven sira-nian no molok ne’e hakarak hasoru uluk joven sira. Tanba, nia esplika, «ha’u ta’uk filtru sira no joven sira nia opiniaun molok to’o iha Roma tenke liu husi koneksaun barak, aérea mós… no iha risku atu filtra sira. Entaun ha’u hakarak rona uluk joven sira: imi mak protagonista!  Joven katóliku, la’ós katóliku, sarani no relijiaun seluk, joven sira ne’ebé la hatene se sira fiar eh la fiar tanba importante mak imi ko’alia no keta husik ema halo imi nonook. Ami nia knaar mak tulun imi atu imi sai koerente ho buat ne’ebé imi dehan, maibé se imi la ko’alia oinsá ami bele tulun imi?», Papa Francisco dehan. Hafoin, nia hatutan: «Ita tulun malu atu Kreda iha oin joven. Dala ida ha’u ko’alia ho ema ida ne’ebé dehan mai ha’u: “Ha’u la hatene se ko’alia kona-ba Santa Inan Kreda eh Santa Avó Kreda”. Ne’e duni, Kreda tenke iha oin joven, imi tenke tulun ami iha buat ida-ne’e».

Joven «konserteza la’ós tanba halo tratamentu ho krema rejeneradora, maibé tanba husi nia fuan nia profundu husik atu nia oan sira interpela nia, interroga nia atu loron ba loron bele sai fiél liu ba Evanjellu». No tuir Papa Francisco, «ida-ne’e mak Santa Inan Kreda presiza ohin-loron. Ami  prepara ami-nia resposta sira, maibé imi presiza interpela nia. Imi tenke doko ami se ami firme liu ho imi-nia ideia sira, laran lahkamatek sira, ho buat hotu ne’ebé imi rai iha fuan laran». Imi tenke – nia hatutan – «sai espiritualmente boot no iha korajen atu dehan: ida-ne’e ha’u gosta, ida-ne’e ha’u la gosta, ida-ne’e la’ós dalan di’ak ida, ida-ne’e la’ós ponte ida maibé muru ida. Dehan buat ne’ebé imi hanoin».

Amu-Papa, ko’alia lahó surat-tahan hodi dehan tan, «se iha atividade ida eh planu pastorál ida, enkontru ida ne’ebé la tulun ita to’o ba Jezús ita lakon tempu, ita lakon oras barak preparasaun nian…. Ita tulun malu atu sai besik liután ba Jezús». Papa Bergoglio husu ba joven sira atu halo minutu ida silénsiu nian no harohan ba Na’i-Feto Karmelu nian, ne’ebé nia estátua iha palku leten, «atu Nia, ne’ebé dixípula dahuluk, tulun ita sai besik liu ba Jezús».

Tuirmai Papa Francisco haktuir istória ida: «Loron ida ko’alia ho joven ida ha’u husu ba nia, saida mak bele halo nia iha umór ladi’ak. Nia dehan mai ha’u: “Bainhira selulár nia bateria hotu eh bainhira ha’u lakon sinál internet nian”. Ha’u husu ba nia: “Tanba sá?”. Nia hatán: “Padre, simples liu, ha’u lakon buat hotu ne’ebé akontese, ha’u hela iha mundu nia li’ur, hanesan tabele hela. Iha momentu sira-ne’e, ha’u halai lalais atu buka karregadór ida eh red wi-fi ida no password atu konekta hikas fali”».

«Ida-ne’e halo ha’u hanoin katak buat hanesan bele akontese ho fiar. Depoizde tempu primeiru dalan nian no impulsu inisiál, iha momentu sira iha-ne’ebé, hodi la konxiente, ita-nia “banda luan” hahú menus no hahú hela lahó “konesaun” ne’ebé fó moris ba ita-nia mehi sira, fuan hahú lakon forsa, nia mós hela lahó enerjia».

Lahó konesaun ho Jezús, «ita ikusmai mout iha ita-nia ideia sira, ita-nia mehi sira, ita-nia fiar no ita hakonu an ho umór lad’iak. Ita desliga an husi buat ne’ebé akontese iha “mundu”. Ita hahú sente katak ita  hela “iha mundu nia li’ur”, hanesan foin-sa’e ne’e hateten. Ha’u preokupa bainhira, lakon “sinál” ema barak hanoin katak sira la iha buat ida atu fó no hanesan lakon. Keta hanoin katak ó la iha buat ida atu fó eh katak ó la presiza ema ida. Nunka ».

Entaun sá loos «password» atu konekta «ho Ida ne’ebé “Dalan, Lia-loos no Moris”». Santu Alberto Hurtado «iha regra osan-mean ida, regra ida atu halakan ninia fuan ho ahi ho kbiit atu mantein moris ksolok. Hutardo nia Password simples liu – se imi hakarak ha’u gosta imi salva iha imi-nia selulár sira. Nia husu ba nia an rasik: “Saida mak Kristu sei halo iha ha’u-nia fatin?”».

Ida-ne’e mak password, kódigu ne’ebé Amu-Papa sujere: «Iha eskola, iha universidade, tuir lurón, iha uma, ho belun sira, iha serbisu; iha ema sira ne’ebé halo an maka’as nia oin: “Saida mak Kristu sei halo iha ha’u-nia fatin?”. Bainhira imi bá dansa, bainhira halo desportu eh ba estádiu: “Saida mak Kristu sei halo iha ha’u-nia fatin?”. Ne’e mak password, enerjia atu halakan fuan, halakan fiar no ahi-funan iha ita-nia matan sira». Papa Francisco husu atu ida-idak salva iha ninia selulár rasik no «labele haluha nia»: «Simplesmente imi tenke… uza nia. Loroloron. Se lae ikusnian ita sai hanesan ahu-na’in iha fime ne’ebé na’ok tiha kofre no bainhira to’o nia haluha tiha password. Nune’e, dekór iha fuan. Password saida loos?», Amu-Papa husu ba foin-sa’e sira.

«Ida-ne’e mak sai protagonista istória nian», nia kontinua. Sai protagonista «katak halo buat ne’ebé Jezús halo. Iha fatin ne’ebé ó iha bá, ho ema naran de’it ó hasoru no iha oras naran de’it: “Saida mak Jezús sei halo iha ha’u-nia fatin?”. Modu úniku atu la haluha password mak uza – nia tenik -.  Sei to’o momentu ne’ebé imi dekór nia; no sei mai loron ne’ebé, maski imi la konxiente, imi-nia fuan sei fekit hanesan ida Jezús nian». Tanba «la to’o rona hanorin relijiozu ida eh aprende doutirna ida; buat ne’ebé ita hakarak mak moris hanesan Jezús moris».

Presiza «ariska, hasoru risku». «Imi bá lalais hasoru imi-nia belun sira – Papa Francisco nia konvite ba ninia interlokutór sira – ba sira ne’ebé imi la koñese eh moris momentu difisil ida. Imi bá ho promesa ida mesak ne’ebé ita iha: iha rai-fuik maran nia leet, iha lurón, iha aventura, nafatin iha koneksaun, eziste “karregadór”. Ita nunka mesak. Ita nafatin haksolok ho Jezús, nia Inan no komunidade ida ninia kompañia. Konserteza komunidade ida ne’ebé la perfeita, maibé buat ne’e la signifika katak la hatene hadomi no oferese ba ema seluk domin ne’e».

Iha konkluzaun enkontru ho foin-sa’e sira Amu-Papa tau iha estátua Na’i-Feto nia ain rozáriu ida depoizde fó bensan, no ikusmai kumprimenta ema hotu ne’ebé marka prezensa, no molok bá nia halo pergunta ikus: «Entaun, sá loos password?». No ema hotu, iha koru ida: «Saida mak Jezús sei halo iha ha’u-nia fatin?»