Festa dahuluk  Jezús nia Futar Fuan Santu selebra iha loron 31 Agostu, 1670, iha Rennes, Fransa, liuhusi esforsu P. Jean Eudes (1602-1680). Husi Rennes maka devosaun habelar, maibé husi vizaun sira St. Margarida Maria Alacoque (1647-1690) nian maka devosaun ne’e sai universál.

Iha vizaun hotu Jezús mosu ba St. Margarida Maria, Jezús nia Futar Fuan iha papél sentrál. “Aparisaun boot” ne’ebé akontese iha loron 16 Juñu 1675, durante loron da-8 Festa Corpus Christi nian, maka sai orijen ba festa Jezús nia futar Fuan Santu. Iha vizaun ne’e Kristu husu ba Margarida Maria atu husu atu selebra Festa Jezús nia futar Fuan Santu iha loron sesta liutiha loron ualu Festa Corpus Christi nian, nu’udar reparasaun ba ema sira nia ingratidaun ba sakrifísiu ne’ebé Kristu halo ba ema sira. Jezús nia Futar Fuan Santu reprezenta la’ós de’it nia fuan fíziku maibé ninia domin ba umanidade.Devosaun sai populár liután liutiha St. Margarida Maria nia mate iha 1690, maibé tanba Kreda fofoun iha dúvida kona-ba vizaun sira St. Margarida Maria niinia validade, iha de’it tinan 1765 maka festa dahuluk bele selebra. Iha 1856,liutiha besik tinan 100 ida, Amu-Papa Pio IX, tanba pedidu husi bispu sira Fransa nian, habelar festa ne’e  ba Kreda universál. Festa ne’e selebra iha loron ne’ebé Nai Jezús husu, katak loron sesta liutiha loron ualu Corpus Christi nian, ka loron 19 liutiha Domingu Pentekoste nian.

Sarani barak maka moris tuir espiritualidade ida-ne’e no, liuhusi nia, sira sai santa durante sékulu ikus sira-ne’e. Presiza filafali ba espiritualidade ne’e nia fonte bíblika no patrístika sira atu deskobre filafali ninia rikusoin no atualidade. Hodi lori ita atu hatán ba Kristu nia domin, hadomi nia no ho nia hadomi Aman, kultu ba Kristu nia futar Fuan santu lori mós ita atu hadomi maun-alin sira, liuliu sira ne’ebé ki’ik no kiak, hodi loke an ba solidariedade fraterna.

FMA sira iha Regra n.27 dehan: “Devosaun ba Jezús nia Fuan, ne’ebé liga ho modu íntimu ba Mistériu eukarístiku no moris iha ita-nia tradisaun, tenke iha espresaun partikulár iha selebrasaun anuál novena nian no solenidade Jezús nia Futar Fuan Santu no iha komemorasaun sesta-feira dahuluk ida-idak fulan nian”.  Hanesan Madre Mazzarello hameno beibeik ba nia oan sira lemo rai nune’e: “Mai ita tama beibeik iha Jesus nia Futar Fuan, ha’u mós sei tama iha-ne’ebá, nune’e ita bele hasoru malu beibeik no dehan ba malu buat barak!” (Surat 17), mai ita haburas domin ba Jezús no domin ba maun-alin sira.  Jezús mak halakon distánsia no muru hotu ne’ebé haketak ita, Jezús mak halo ita sai fuan ida de’it iha domin. Mai ita, loos duni, sai sasin kona-ba Jezús nia Fuan nakonu ho domin no husik nia kontinua hadomi maluk hotu liuliu foin-sa’e sira liuhusi ita.