SÉ MAK REITOR-MOR ?

Reitór-Mor mak Superiór kongregasaun Saleziana nian. Nia mak susesór Don Bosco nian, Aman no sentru unidade ba Família Saleziana. Ninia knaar uluknanai hamutuk ho ninia konselleiru jerál atu hametin fidelidade ba karizma Don Bosco hodi kumpri missaun ne’ebé Na’i Maromak tau fiar ona ba kongregasaun Saleziana.

Don Bosco dehan: “Imi nia primeiru Reitór mate ona, maibé imi nia superiór loloos, Na’i Jesus Kristu, la mate. Nia mak sei sai nafatin ita nia mestre, ita nia matadalan,ita nia modelu. keta haluha katak ikus mai Nia mak sei sai ita nia juiz no rekompensadór ba ita nia fidelidade ba Ninia serbisu. Imi nia Reitór la moris ona, maibé sei hili seluk ne’ebé sei tau matan ba imi no ba imi-nia salvasaun rohan laek nian. Rona nia, hadomi nia, obedese nia, harohan ba nia, nu’udar imi halo tiha ona mai ha’u”.

Sentru ne’ebé garante unidade no hanoin Don Bosco nian mak Reitór-Mor. Iha nia, ita hotu rekoñese ninia knaar  tolu: Susesór Don Bosco nian, Aman ba Família Saleziana no sentru unidade família.

REITÓR-MOR ATUÁL

Reitór-Mor hala’o nia knaar durante tinan nen(6) nia laran,hafoin liu husi kapítulu jerál saleszanu sira-nian ne’ebé hala’o kada tinan neen (6), hili Reitór-Mor foun. Iha loron 25 fulan marsu 2014, Reitór-Mor sesante Amu Pascual Chaves husik nia knaar ba Reitór-Mor foun ne’ebé hetan hilin husi membru kapitulár sira iha kapítulu jerál 27 mak Amu Ángel Fernández  Artime nu’udar, Don Bosco nia susesór ba dala X. Salezianu sira nia kapítulu jerál 27 mak órgaun hodi deside nian ne’ebé aas liu iha kongregasaun, hili superiór jerál ho nia konselleiru  sira ba mandatu tinan neen (6) nia laran. Amu Pascual Chaves, Reitór-Mor sesante dehan ba Reitór-Mor foun nune’e: “Amu Ángel doben, Maromak liu husi maun alin salezianu sira bolu ita ohin atu sai nu’udar susesór ba Don Bosco. Hodi asembleia kapitulár nia naran ha’u husu ba ita atu simu”. Ho emosaun, Amu Ángel simu liafuan hodi dehan iha lia español: “Ha’u entrega an iha Na’i no ha’u husu Don Bosco no Maria Auxiliadora atu akompaña ita no akompaña ha’u, iha fraternidade saezianu sira-nian no ho Kongregasaun, no ho fiar ha’u aseita”.

BIOGRAFIA

Amu Ángel Fernandes Artime, tinan 57, moris iha loron 21 Agostu 1960 iha Gozón-Luanco Oviedo, España. Halo primeira profisaun iha loron 3 Setembru  1978 iha Guadalajara no halo nia profisaun perpétua iha  17 Juñu 1984 iha Santiago de Compostela, no sai Amu lulik iha 4  jullu 1987. Hetan diploma iha Teolojia Pastorál no Lisensiatura iha Filosofia no Pedagojia.  Hafoin simu knaar nu’udar delegadu ba pastorál juveníl, Reitór iha koléjiu salezianu Oriense, membru konsellu provinsiál no Vigáriu provinsiál no tuir mai sai nu’udar Provinsiál iha tinan 2002-2006 iha provínsia  Le­on, España.  Iha tinan 2009 sai nu’udar provinsiál  iha Argentina sul no nia sede iha Buenos Aires. Iha ne’ebá mak nia koñese di’ak Arsebispu Buenos Aires nian, kardeál Jorge Mario Bergoglio ne’ebé ikus mai sai Amu-Papa Francisco. Amu Ángel ikus mai hetan hili nu’udar Don Bosco nia saseluk da-X iha 25 Marsu 2014 liuhusi kapítulu jerál da-27 iha Roma.