Liturjia Domingu II Tempu Komún nian propoin reflesaun ida kona-ba disponibilidade atu hakohak Maromak nia dezafiu sira no atu tuir Jezús.

Leitura dahuluk aprezenta mai ita istória Samuel nia bolun nian. Autór reflesaun ne’e nian deskreve momoos katak bolun mak nafatin Maromak nia inisiativa ida, ne’ebé mai hasoru ema no bolu nia ho nia naran. Ema presiza de’it iha atitude disponibilidade totál nian atu rona Maromak nia lian no nia dezafiu sira.

Evanjellu deskreve Jezús nia enkontru ho dixípulu dahuluk sira. Sé mak Jezús nia “dixípulu”? Sé mak bele integra iha komunidade Jezús nian? Iha João nia perspetiva, dixípulu mak ida-ne’ebé iha kapasidade atu rekoñese iha Kristu, Mesias libertadór ne’ebé liu, ida-ne’ebé disponivel atu tuir Jezús iha dalan domin no saran an nian, ida-ne’ebé aseita Jezús nia konvite atu tama iha nia uma no moris iha komuñaun ho Nia, ida-ne’ebé iha kapasidade atu fó sasin kona-ba Jezús no haklaken Nia ba maun-alin sira seluk.

Iha leitura daruak,, Paulo konvida sarani sira Corinto nian atu moris ho forma koerente ho bolun ne’ebé Maromak halo ba sira. Iha fiar-na’in ne’ebé moris iha komuñaun ho Kristu, tenke manifesta nafatin moris foun Maromak nian. Hodi aplika ba área seksualidade nian – kampu ida ne’ebé sarani sira Corinto iha frakeza boot – signifika katak tenke halakon husi moris sarani nian hahalok no toman aat/dezordenadu sira.

Download