Palla / Sumba (Indonesia) – Ho fuan nakonu ho agradese ba Maromak ne’ebé loron ba loron haraik nafatin ba ita grasa no tulun wain be wain. Hodi tama ba tinan foun 2018 ami iha Pulau Sumba-Indonesia hetan oportunidade atu haklean liu tan koñesimentu kona-ba Akompañamentu ne’ebé me.Jacinta Gusmão hatoo ba  ami  iha Sumba.

Iha loron 06 Janeiru iha komunidade MadreMazzarello Palla-Sumba, Irmán sira komunidade rua: Palla no Bondo Kodi ho ksolok  bo’ot  simu Me. Jacinta Gusmão ne’ebé mai  fo seminar kona-ba Akompañamentu tuir Patronu no sira Salezia nian no tuir Don Bosco no Madre Mazzrello sira nia estilu. Iha okaziaun ne’e Irmán sira husi komunidade rua hamutuk me. Jacinta ba hare komunidade foun iha Bondo Kodi no  mos halo passeio komunidade hamutuk iha   Pantai Waikuri. Iha loraik Madre hahú ho introdusaun hodi ko’alia no aprezenta kona-ba estreia Rector Mor 2018.

Loron tuir mai ami hahú ho akompañamentu tuir ita nia Patronu sira S. Fransisco de Sales no St. Teresa de Avila nia estilu hodi hare resonánsia ho fundadór sira nia estilu. Seminar ne’e furak tebes basá fanu fali ami nia hanoin no tulun tebes ami atu uluk nanain hateke ba Patronu no Fundadór sira nia moris no ami nia esperiénsia oinsá simu akompañamentu nune’e bele sai akompañadora ne’ebé di’ak hodi tau matan ba foin-sa’e, labarik ka grupo kategorial sira. Hare mos ba Reitor Mor nia Estreia no Sínodu ba foin-sa’e sira, tebes duni foin-sa’e sira ohin loron presiza tebes ita nia tulun atu akompaña sira atu buka buat ne’ebé di’ak liu ba sira nia moris ne’e mak Maromak. Nune’e akompañadora sira mos tenke nakonu ho Maromak Nia grasa no iha kualidade moris nian atu bele akompaña.

Iha loron ikus madre ko’alia kona-ba DB no MM nia Akompañamentu. Iha ne’e haree ba atitude sira ne’ebé tulun atu sai akompañadora ne’ebé loloos. Ita nia akompañamentu mak edukativu liu husi asisténsia, sai prezente nafatin iha foin-sa’e sira nia le’et koñese sira no rona no fo konsellu ba sira liu husi liafuan iha tilun. Buat ne’ebé furak mos iha seminar ne’e madre la’os de’it fahe buat ne’ebé teoria de’it maibe oinsá nia esplika hodi fahe buat ne’ebé kona ho esperiénsia moris konkretu lor-loron. Iha buona notte, madre dehan: atu sai akompañadora ne’ebé loos tenke fila ba abut mak Kristu no metin iha ita nia karizma. Iha fatin ne’ebé ita ba, ita kria fatin  ne’e bele sai Morneze. Bele sai perigu bainhira hela do’ok husi  Ispetoria bele mos do’ok husi Karizma. Tan ne’e tenke Le’e fila fali dokumentu sira ita nia espiritualidade nian atu labele lakon. Hodi  hateke fali ba Patronu no Fundadór sira nia moris loke fali ami  nia neon atu hamrik metin ba karizma ne’ebé sira husik hela.

Obrigada barak madre  Jacinta ba domin, disponibilidade, ksolok, laran di’ak no laran luak  fahe madre nia matenek ba ami. Ami fiar katak Maromak sei haraik bensaun no tulun wain ba madre. Ita nia Santu Patronu no Fundadór sira mós kontente ho di’ak hotu ne’ebé Madre halo ona  ba ami no ami saran ba Sira madre nia intensaun hotu.

(Kom.MM no Angela Vallese)