Cailaco – Selebrasaun festa Epifania do Senhor katak Jesus hatudu Nia-An ba mundu no ba umanidade tomak. Iha tempu hanesan ohin loron 7/12 Kreda universal selebra mos loron OPIAM  nian (Obra Pontificia Infancia e adolescencia Misionaria). Realidade ohin loron hatudu katak kreda iha konfiansa no esperansa boot ba labarik kik-oan sira mos sai nu’udar forsa kreda nain ho sira nai moto “labarik tulun labarik” ho espiritualidade : ORASAUN, ESMOLA , SAKRIFISIU NO SASIN.

Iha Kailaku loron ida ne’e ami selebra ho Eukaristia Solene ne’ebé preside husi Pe. Norbertu iha nia omilia nia hateten katak atu oan sira hetan susesu presiza tebes inan aman nia kolaborasaun hodi orienta sira ba dalan loos. Presiza kuda valores diak sira hahu husi kiik nune’e nia mos husu familia sira atu husik sira nia oan sira atu tuir atividades kreda nian. Depois de comuñaun OPIAM sira hafoun fali sira nia kompromisu hodi hasae mos sira nia Orasaun.

KOMPROMISU  KA PROGRAMA DA VIDA OPIAM

1. tulun ema seluk atu konese no hadomi Jesus
2. Halo buat hotu-hotu ho ksolok
3. Tulun ema kiak sira ho buat ne’ebe hau nia bairru
4. Reza ba labarik no adolesente sira iha mundu
5. hatene agradese Maromak ba buat diak hotu ne’ebé hau simu
6. Buka nafatin informasau kona ba akonteseimentu ne’ebé involve ema hotu hosi kontinente lima
7. Rekoñese buat diak moris nian no kultura povo seluk nian, hodi respeita no fo valor ba sira 
8. Sai ema ne’ebé responsavel iha uma, iha escola, iha comunidade no haklaken evangelho ho ezemplo moris 
9.  La deskorajen bainhira hasoru difikuldades
10. Halo atu ema hadomi Na’I Feto

 

Hotu tiha sira renova sira nia kompromisu sira mos hasae sira nia orasaun:  

“Na’i Jesus, hau foin atu hahu moris no Ita bolu ona hau ba misaun  ida.

O hatene lolos, katak hau laiha buat ida, se lae iha deit hakarak atu servi Ita.

Haraik mai hau, O nia matenek, Na’i, O nia domin, O nia paz, no fuan ida ne’ebé boot atu hadomi mundo tomak.

Na’i, hau hatene katak, hau labele halo buat ida, maibe ho Ita hau sei halo buat furak liu.

 Na’i, labarik rihun ba rihun lahatene Itaboot, tamba ne’e mak sira la haksolok.

Hau saran hau nia moris tomak ba Ita no hau tau hau nia an iha O nia liman: hakonu hau ho aten brani,sinseridade no responsabilidade ho hau nia maun alin sira.

Na’i, hau hatene katak Ita rona hau, no lao nafatin ho hau.

Tan ne’e hau hakarak atu O nia naran ema hotu bele hatene no O nia Reino bele habelar iha mundo tomak. Amen”.

 

Familia sira ne’ebé asiste sira nia oan sira kontente tebes no promote katak sira sei kontinua suporta atividades hotu ne’ebe irman sira oferese ba sira nai oan sira. sira espera katak ho atividades sira kreda nian bele lori sira nia oan sira hakbesik-an ba Maromak no bele lori mudansa mentalidade ba sira nia moris. Iha loron ne’e familia sira mos kontribui ho esmola ne’ebé sira halo sei tau hamutuk ho oan sira nia kontribuisaun hodi lori ba dioseze atu tau hamutuk no lori ba Roma. Kontribuisaun maske oituan maibe espresa duni sira nia laran luak suporta ba kreda universal nia presiza iha Evanjelizasaun.

Iha loraik tuku lima hamutuk ho sarani sira, ADMA no Jovens balun maai reza tersu hamutuk. Tersu dirije husi OPIAM sira. remata tiha tersu iha animasaun, jogos  hafoin  merenda hamutuk no ida-ida fila ba sira nia uma.

Ohin dia 8/12 ami selebra festa Batismo do Senhor no labarik lubuk ida mak simu Batizmu. Iha omilia amu Norberto hateten katak Jesus nia Batizmu loke dalan ba ita sarani sira no too ohin loron sai nudar sakramentu inisiasaun ne’ebe sarani hotu-hotu tenke simu atu bele sai membru kreda nian.

Durante preparasaun Ir. Virgilia no Ir. Ermelinda husu atu inan-aman sira responsavel ba oan sira nia kresimentu spiritual no eduka sira tuir fiar sarani nian. Inan-aman balun sei barlakiadu hela no sira promete katak iha tempu besik sira mos hakarak atu simu sakramentu matrimonio.

(Albina do Carmo)