Dili – Ekipe Komunikasaun Sosiál FMA TIN halo enkontru badak ida, ohin, 4 Janeiru 2017, atu finaliza programasaun ba tinan 2018. Liña asaun ne’ebé unifika “Komsos” ninia serbisu mak “Relasaun evanjélika no interpesoál”.

Nune’e, Ámbitu “Komsos” ne’ebé iha motto ka lema “forma no informa” iha tinan-ne’e kontinua tulun FMA no komunidade sira, foin-sa’e sira atu iha komprensaun krítika kona-ba lójika meiu komunikasaun sosiál nian, atu sai preparada ho modu adekuadu atu eduka an no eduka foin-sa’e sira moris ho modu krítiku no responsavel iha kultura mediátika. Liuliu tanba ohin loron ema moris relasaun online no offline lahó separasaun, liuhusi prezensa (enkontru ida) eh liuhusi mediasaun dijitál ida (n.e. mensajen WhatsApp, facebook), hodi la distinge realmente momentu sira-ne’e, ita presiza forma an atu umaniza relasaun sira-ne’e.

Ho hanoin ba kualifikasaun relasaun interpesoál online/offline ne’e mak iha tinan ne’e ámbitu sei oferese workshop ba FMA sira no foin-sa’e sira. Ba foin-sa’e  sira ami foka kona-ba utilizasaun internet liuliu rede sosiál sira. Tópiku sira mak:  Rede sosiál no jardín zoolójiku; social network and privacy; facebook addiction; evanjeliza iha rede sosiál.

Ba FMA sira sei hakle’an tema husi livru  “I consacrati e la rete. Abitare Internet con sapienza” (kapítulu 4-7), ne’ebé FMA ida naran Caterina Cangià mak hakerek.

Aleinde ida-ne’e ekipe mós haree kona-ba tema formasaun grupu nian liuliu iha parte téknika hanesan programa sira ba “design” revista no photo editing. Buat hotu atu “tatoli ksolok Evanjellu” nian!
Membru ne’ebé la tuir enkontru mak Ir Lucia Pereira tanba hetan impedimentu.