Laga – Komunidade Beata Laura Vicuña Laga, selebra tinan foun 2018, halo paseio ida husi foho too tasi. Ami sai husi uma iha tuku sia dader, too iha fatin, uataá tuku sanulu. Ida ne’e mak paseio dahuluk nian nu’udar komunidade. Objetivo mak atu hametin ami nia relasaun nu’udar bin-alin iha komunidade.

Fatin Uataá mak fatin furak ida, subar an iha rai Nu’unira Laga, hanesan haree iha fotografia, maibe dalan mak susar atu too ba fatin ne’e. Dalan namdoras, tenki kaer iha ai-horis be moris iha dalan ninin, sama iha fatuk atu labele monu, hakruk ba ai-hun be monu iha dalan, maibe too iha fatin be monu/kaskata nian, ita la hanoin hetan ona dalan susar, maibe hahi Maromak ba buat kmanek no furak be iha ita nia matan ne’e.

Hare natureza be furak, ita bele dehan, Ida be halo ne’e kmanek liu ida ne’e, ita lahatene oinsa nia halo, la iha ida mak sasin wainhira Nia halo, maibe ita nia espresaun wainhira haree buat ida be hanesan ne’e,  ita dehan “Maromak ne’e boot duni, la iha ida mak hanesan Nia”. Moris iha rai mak susar, maibe lalehan kala furak liu ida ne’e.

Liu tiha ida ne’e, ami tun fali mai iha tasi, tamba haree hanesan atu udan, se udan karik, kareta labele sai ona, taho namdoras sa’e tan foho, nune’e ami mai iha Leonia (orfaun ida) nia familia han nu’u, hafoin ami ba fali iha tasi, iha Laivai (Euquisi). Maski udan maibe la iha ondas be baku maka’as nune’e ami hariis too loron kraik mak ami fila.

Maromak nafatin fo tempo diak ba nia oan sira, atu menikmati natureza be nia prepara ona ba nia oan sira, hori nanis kedas molok ita moris.

(Simoa Correia