Editoriál:Sai husi an rasik  hodi fó sasin

Ita besik daudaun ba Tinan Fiar nia rohan. Iha tempu grasa nian ida-ne’e, ita iha mós preparasaun ba selebrasaun tinan 25 prezensa FMA nian iha Timor-Leste. Durante tempu hirak ne’e Maromak vizita ita ho modu oioin: liuhusi eventu Kreda nian no Institutu nian; eventu sira ksolok no terus nian. Atitude importante mak hatene nafatin rona, haree no dixerne Maromak nia Liafuan sira maski ita susar atu komprende, hanesan Na’i-Feto halo.

Ita foin remata Ezersísiu Espirituál sira. Madre Mazzarello iha nia surat ida  hateten: “Iha tempu Retiru nian ita halakan ona ahi iha ita-nia fuan, maibé se dala ruma ita la book ahi-kdesan no ita la tau tan ai ruma, ahi sei mate. Agora mak tempu loos atu halakan filafali ahi” (Surat 27, 8). Ita buka hamoris ahi ne’e hodi rona nafatin Na’i iha nia Liafuan, iha Majistériu Kreda no Papa Francisco nian, iha eventu sira, iha foin-sa’e sira-nia moris.
Papa Francisco ho kapasidade boot atu komunika, konvida Kreda tomak atu sai husi an rasik hodi bá iha perifieria sira moris nian no abandona autoreferensialidade, hatudu Maromak nia oin laran-sadia nian.
Hodi metin ba ita-nia identidade sarani no karizmátika ita sei sai sasin Maromak nia domin preventivu liuhusi moris teologál, sasin fiar nian, esperansa nian no domin nian.