Husi Ir.Ermelinda Gomes FMA

Fatumaka – Horisehik, 24 Agostu 2013, festa S. Bartolomeu Apóstolu nian, Sosiedade S. Fancisco de Sales eh “Salesianos de Dom Bosco”, Família Saleziana tomak no Kreda Timor-Leste haksolok ho ordenasaun amlulik foun na’in rua: padre Amarianto Adirson A.A. SDB no padre João Pereira Gaspar SDB.

 

Iha ninia omilia Amu-Bispu D. Basílio hahú hodi komenta Evanjellu ne’ebé ko’alia kona-ba oinsá Jezús hatene Natanael molok nia hasoru Jezús ba dala uluk iha ai-figueira nia okos.

Kaer fraze Evanjellu nian iha-ne’ebé Natanael husu: “Husi Nazaré bele mai buat di’ak ruma?”, pergunta hanesan mós mak Amu Basílio dirije ba sira na’in rua ne’ebé atu simu ordenasaun: “Buat di’ak ruma bele mai husi Baucau/ Ossu no Watu-Karabau?”

Iha primeira leitura mós ita rona oinsá Samuel rona Na’i nia lian liu husi profeta Eli. “Maromak uza buat oi-oin atu bele bolu ita ema”, Amu-Bispu dehan. Esperiénsia oioin iha ita-nia moris bolu ita no hakbesik ita ba Na’i, atu fiar iha Nia. Fiar mak esperiénsia ita ida-idak nian ho Maromak.

“Ita bele sai intelektuál, matenek, naran boot maibé se vida santidade laiha vida Nailulik sai maran”, Amu-Bispu hatutan tan. Ita nia fiar sai buras iha dalan ka prosesu fiar nian. Se ita para iha dalan ita bá kotuk no ita-nia moris la fó fuan, namlaek. Mate! “Kompromisu Nailulik nian sai deskoberta ida kona-ba Maromak. Sai mos interrogasaun hafoin ita halo kompromisu ida wainhira ita komprende buat ne’e folin no vale ba ita”.

Tuir Amu Basílio, “bainhira ita sente buat ruma folin mai ita mak ita luta, halo sakrifísiu oioin atu bele hetan. Kompromisu fidelidade halo husi ita nia deskoberta kona-ba Maromak. Deskoberta ne’e mós hasoru dezafiu sira, ksolok, terus, susar maibé se ita deskobre nia folin, nia valór, ita sei pronti atu kompromete an”, Amu destaka.

Hafoin nia esplika kona-ba Sakramentu Orsen nia valór no husu “Ha’u sai nailulik ne’e ha’u-nia vida sarani nia folin saida loos?. Nia halo ha’u sai diferente ho ema seluk, halo ha’u sai bibi-atan ba ema seluk”.

Ikusnian, nia konvida atu sira aprende husi Bartolomeu nia atitude hasoru nia dúvida sira ne’ebé bele sai mós sira-nia dúsvida. “Buat diak ruma bele mai husi Baucau/ Ossu/ Watu-Karabau?” Iha enkontru pesoál ho Jezús mak Bartolomeu hetan resposta ba nia dúvida sira. Ne’e mak tenke sai konsagradu nia dalan, atu bele haklaken la’ós nia laifuan ,aibé Ida ne’ebé haruka nia ninia liafuan.

Iha Tinan Fiar nian ne’e, sai amlulik iha knaar atu fanun ema ne’ebé nia fiar namlele hodi eduka ba fiar ne’ebé loos. Sai Bibi-Atan tuir Kristu mak lori bibi sira ba dalan loos liuhusi la’ós de’it sasin moris nian nu’udar konsagradu maibé hodi fó moris rasik ba bibi sira. Ne’e mak ami-nia votus mós ba amlulik foun na’in rua” padre Adoy no padre Gaspar.