Venilale – Durante semana daruak no datoluk adventu nian, Irmán FMA sira no grupu pastorál parókia nian hamutuk ho padre sira hakat ba fatin oioin atu naima sarani sira ba preparasaun Natál ho retiru no sakramentu Rekonsiliasaun.

Tema ba retiru tinan ne’e, la’o ho programa pastorál dioseze Baucau nian, kona-ba “Komunga Kristu no moris hanesan Nia”. Nune’e, tema retiru nian mak “Belém, Uma Paun Moris nian”.

Iha retiru ba pré-adolexente no adolexente sira eskola pré-sekundária no sekundária nian, sira hahú ho invokasaun ba Espíritu Santu, hafoin rona Maromak nia Liafuan.

Hafoin sira reflete kona ba uma no família Jezús, José no Maria nian ne’ebé hanaran família Nazaré. Família ida ne’ebé nakonu ho grasa Na’i Maromak nian no virtude sira, virtude ne’ebé hatudu  santidade moris nian. Iha família Nazaré ne’e mak Jezús “Paun Moris nian” mai horik iha ema nia leet. Ne’e  mak Maromak Oan Mane ne’ebé hola isin hanesan ita ema no liu husi Ninia Futar Isin no Raan rasik sai paun moris nian mai ita ema nia klamar.

Atividade sira atu tulun estudante sira atu prepara an ba simu Jezús mak harii sira-nia uma. Foin-sa’e sira fahe ba grupu hafoin ida-idak sira halo jogu “buka rikusoin”. Hetan tiha rikusoin sira buka harii uma ida ba Jezús ne’ebé hafutar ho virtude sira. Ne’e mak uma fuan nian, atu sai sira-nia “Belém”, katak sai fatin ne’ebé soi duni ba Na’i Makso’ik,. Hodi husik Na’i “Paun Moris” nian horik iha sira, sira mós bele sai “paun” ba maluk sira liuhusi sira-nia hahalok domin nian, karidade nian, laran-luak nian, perdaun nian, respeitu nian, badinas nian, ksolok nian.

Hanesan Jezús, sai paun ba maluk sira.

(Aurea Freitas)