Maliana – Tanba situasaun polítika ne’ebé la’o hela iha ita nia rain hamosu preokupasaun iha povu nia leet no mós husi parte Kreda nian. Ba razaun ida-ne’e mak dioseze Maliana hamutuk ho povu tomak halo novena ba paz no estabilidade iha Timor. Novena prepara husi dioseze no fahe ba estasaun misionária hotu-hotu iha dioseze Maliana atu reza loron-loron hahú husi 8/12 too 16 /12, no remata ho prosisaun no Missa hamutuk iha katedrál Maliana.

Prosisaun hahú iha gruta too iha katedrál Maliana. Prosisaun ida ne’e inisiativa husi Bispu rasik no iha nia mensajen molok hahú prosisaun nia husu sarani sira atu dedika loron ida ne’e hodi reza ba dame iha Timor liuliu ba ukun-na’in sira atu iha sensibilidade hodi hari dame no estabilidade atu povu bele moris hakmatek.

Maske distansia dook  la’o ain durante oras tolu, la hamate entuaziamu husi sarani sira, autoridade munisipiu nian, grupu kategoriál sira kreda nian no relijiozu/a ne’ebé hola parte iha dioseze Maliana nian tanba hotu-hotu iha objetivu ida de’it katak liuhusi orasaun no sakrifísiu Na’i bele haraik ba ita nia rain liu-liu ba ita nia lider polítiku sira atu haraik-an hodi simu malu no tau aas interese povu nian.

Prosisaun too iha igreja tuku 12:00 no kontinua kedas ho santa Missa. Iha Omilia Amu-Bispu agradese ba hotu-hotu nia partisipasaun no husu atu sarani sira kontinua reza ba dame iha ita nia rai. Nudar sidadaun ita fo ona ita nia kontribuisaun no ita hein katak ita na’i-ulun sira mós bele kontribui hodi buka atu povu sira bele moris hakmatek.

Husi Cailaco ami ba ho sarani sira, OPIAM, Akolitus no ADMA sira. Maske Estrada susar loos maibe ho Na’in feto nia akompanamentu buat hotu la’o di’ak. Husi atividade hirak ne’e tulun sarani sira atu hatene halo sakrifísiu no nu’udar espresaun ne’ebé  Don Bosco dehan “Sai sarani di’ak no sidadaun ne’ebé onestu”.

(Albina do Carmo)