Amu-Papa nia liafuan iha Angelus 25 Agostu 2013

“Maun no biin-alin sira, bondia!

Evanjellu ohin nian konvida ita atu reflete kona-ba tema salvasaun nian. Jezús sae daudaun husi Galieia ba sidade Jerusalém no tuir dalan ema ida – evanjelista Lucas haktuir – hakbesik ba Nia no husu: «Na’i, ema uitoan de’it mak hetan salvasaun?» (13,23). Jezús la hatán diretamente ba pergunta: importante la’ós hatene ema na’in hira sei salva, maibé importante mak hatene sá loos dalan ba salvasaun.

Nune’e mak ba pergunta ne’e Jezús hatán hodi dehan: «Imi haka’as an atu tama husi odamatan kloot, tanba ema barak mak buka atu tama, maibé la konsege» (v. 24). Sá loos mak Jezús hakarak dehan? Sá loos odamatan ne’ebé ita tenke uza atu tama bá? No tanba sá Jezús ko’alia kona-ba odamatan kloot?

Ilas odamatan nian nian dala barak mosu iha Evanjellu no fó hanoin kona-ba uma, ba lar família nian, iha ne’ebé ita hetan seguransa, domin, afetu. Jezús dehan mai ita katak iha odamatan ida  ne’ebé halo ita tama iha Maromak nia família, iha afetu Maromak nia uma nian, iha komuñaun ho Nia. Odamatan ne’e mak Jezús rasik (kf Jo 10,9). Nia mak odamatan. Nia mak pasajen ba salvasaun. Nia mak lori ita ba Aman. No odamatan ne’ebé Jezús rasik, nunka taka, odamatan ne’e nunka taka, nakloke nafatin no ba hotu, lahó distinsaun, lahó eskluzaun, lahó priviléjiu. Tanba sá, imi hatene, Jezus nunka esklui ema ida. Ema ruma karik bele dehan mai ha’u: “Maibé, Padre, seguramente ha’u eskluzu, tanba ha’u ema maksalak boot: ha’u halo buat aat, ha’u halo barak, iha moris”. Lae, ó la eskluzu! Presizamente ba ne’e mak ó sai favoritu, tanba Jezús prefere ema maksalak, nafatin, atu perdua nia, atu hadomi nia. Jezús hein ó atu hakohak ó, atu perdua ó. Keta ta’uk: Nia hein ó. Book an bá, aten barani bá atu tama husi nia odamatan. Ita hotu simu konvite atu hakat liu odamatan ne’e, atu hakat odamatan fiar nian, atu tama iha nia moris, no atu halo nia tama iha ita-nia moris, nune’e Nia bele nakfilak moris, hafoun, haraik don ksolok nakonu no dura kle’ur.

Ohin loron ita liu iha odamatan barak nia oin ne’ebé konvida ita atu tama hodi promete ksolok ida ne’ebé ikusmai ita konxiente katak dura uitoan de’it, ne’ebé mohu iha an rasik no la iha futuru. Maibé ha’u husu ba imi: husi odamatan ida ne’ebé mak ita hakarak tama? No sé mak ita hakarak atu halo tama iha odamatan ita-nia moris nian? Ha’u hakarak dehan ho forsa: ita keta ta’uk atu hakat liu husi odamatan fiar nian iha Jezús, atu husik Nia tama ba beibeik iha ita-nia moris, atu sai husi ita-nia egoízmu sira, husi ita-nia taka an sira, husi ita-nia indiferensa hasoru ema seluk. Atu Jezús leno ita-nia moris ho roman ida ne’ebé nunka mate. La’ós ahi ida fogete nian, la’ós flash ida! Lae. Nia mak naroman hakmatek ida ne’ebé dura ba beibeik no haraik dame mai ita. Hanesan ida-ne’e naroman ne’ebé ita hetan se ita tama husi Jezús nia odamatan.

Loos duni katak Jezús nia odamatn kloot, la’ós tanba iha sala tortura nian. Maibé tanba Nia husu ita loke ita-nia fuan ba Nia, atu rekoñese an nu’udar sala-nain, ne’ebé presiza ninia salvasaun, ninia perdaun, ninia domin, atu iha haraik-an atu simu ninia laran-sadia no hafoun fali ita. Jezús iha Evanjellu dehan mai ita katak sai sarani la’ós iha «rótulu» ida! Ha’u husu b aimi: imi ema sarani rótulu nian ka loos nian? No ida-idak hatán iha laran! La’ós ema sarani, nunka sai ema sarano rótulu nian! Sarani loos nian, fuan nian. Sai sarani katak moris no fó sasin kona-ba fiar iha orasaun, iha obra karidade nian, iha hahalok promove justisa nian, iha hala’o buat di’ak. Husi odamatan kloot ne’ebé Kristu rasik mak ita-nia moris tomak tenke liu.

Ba Maria Virjen, Odamatan Lalehan nian, ita husu atu tulun ita hakat liu odamatan fiar nian, atu husik nia Oan nakfilak ita-nia ezisténsia hanesan nia nakfilak ninian rasik atu lori ba ema hotu ksolok Evanjellu nian”.