Maun no biin-alin sira, bondia!

Iha domingu sira liubá liturjia subliña saida mak signifikadu tau an iha atitude vijilánsia nian no saida mak komporta prepara dalan konkretamente ba Na’i. Iha domingu datoluk Adventu nian, hanaran “domingu ksolok nian”, liturjia konvida ita atu kapta espíritu iha-ne’ebé ida-ne’e buat ne’e akontese, katak, ksolok. S. Paulo konvida ita atu prepara Na’i nia mai hodi asume atitude tolu. Imi rona didi’ak. Dahuluk, ksolok konstante; daruak, orasaun perseverante; datoluk, hasa’e agradesimentu kontínuu. Ksolok konstante, orasaun perseverante no hasa’e agradesimentu kontínuu.

Atitude dahuluk, ksolok konstante: «Imi haksolok nafatin» (1 Ts 5,16), S. Paulo hateten. Ne’e katak horik nafatin iha ksolok, maski sasán sira la tuir ita-nia hakaran; maibé iha ksolok kle’an, katak pás: ida-ne’e mós ksolok, iha laran. No pás mak ksolok ida “nivel rai nian”, maibé ksolok ida. Ansiedade sira, difikuldade sira no terus sira atraversa ema ida-idak nia moris, ita hotu, hatene buat sira-ne’e; no dala barak realidade haleu ita parese la simu ita no maran, hanesan dezertu iha-ne’ebé nalian João Batista nia lian, hanesan Evanjellu ohin nian fó hanoin (Kf Jo 1,23). Maibé Batista nia liafuan rasik revela katak ita-nia ksolok sadere ba serteza ida, katak dezertu ne’e iha makhorik: «Iha imi-nia leet – nia dehan – iha Ida ne’ebé imi la hatene» (v. 26). Nia mak Jezús, Aman nia manu-ain ne’ebé mai, hanesn Isaías subliña, «atu lori liafoun ksolok ba ema mukit sira, atu kurafuan kanek sira, atu haklaken liberdade ba atan sira, hasai ema dadur sira, haklaken tinan ida grasa Na’inian» (61,1-2). Liafuan sira-ne’e, ne’ebé Jezús sei halo iha nia diskursu iha sinagoga Nazaré nian (kf Lc 4,16-19), klarifika katak ninia misaun iha mundu konsiste iha libertasaun husi salan no husi moris-atna pesoál no sosiál ne’ebé nia prodús. Nia mai iha rai atu haraik hikas ba ema sira digniidade no liberdade Maromak nia oan sira-nian, ne’ebé Nia de’it bele komunika, no fó ksolok ba ne’e.

Ksolok ne’ebé karakteriza espetativa Mesias nian, nia baze mak orasaun perseverante: ida-ne’e mak atitude daruak. S. Paolo dehan: «Imi harohan hodi la para» (1 Ts 5,17). Liuhusi orasaun ita bele tama iha relasaun estavel ho Maromak, Nia ne’ebé bee-matan ksolok loloos nian. Sarani nia ksolok la sosa, labele sosa; mai husi fiar no enkontru ho Jezús Kristu, razaun ba ita-nia ksolok. No hetok ita tau abut iha Kristu, hetok ita besik liután ba Jezús. Ita sei hetan liután serenidade interiór, maski iha kontradisaun loroloron nia leet. Tanba ne’e ema sarani, hetan tiha Jezús, nia labele sai profeta ida desgrasa nian, maibé sasin ida no manu-ain ida ksolok nian. Ksolok ida atu partilla ho ema seluk; ksolok kontajiozu ida ne’ebé halodalan moris nia ladún susar.

Atitude datoluk ne’ebé Paulo hatudu mak hasae agradesimentu kontínuu, katak domin ne’ebé agrade ba Maromak. Tebes duni, Nia laran-luak liu ho ita, no ita simu konvite atu rekoñese nafatin ninia benefísiu sira, ninia domin mizrikordiozu, ninia pasiénsia no laran-di’ak, hodi moris nafatin iha agradesimentu kontínuu.

Ksolok, orasaun no agradesimentu mak atitude tolu ne’ebé prepara ita atu moris Natál ho modu auténtiku. Ksolok, orasaun no agradesimentu. Ita hotu dehan hamutuk: ksolok, orasaun no agradesimentu [ema iha Prasa repete]. Dala ida tan! [sira repete]. Iha parte ikus tempu Adventu nian, ita konfia ita-nia an ba Virjen Maria nia intersesaun nu’udar inan. Nia mak “ita-nia ksolok nia kauza:, la’ós de’it tanba nia tur ahi Jezús, maibé tanba nia haruka kontinuamente ita ba Jezús.

Ba labarik sira ho Kosok-Oan Jezús atu simu bensan:

“Bainhira imi reza iha uma, iha prezépiu nia oin hamutuk ho imi-nia família sira, imi husik atu Jezús Kosok-Oan nia ternura dada imi, nia ne’ebé moris kiak no frajil iha ita-nia leet, atu haraik mai ita ninia domin, Ida-ne’e mak Natál loloos, Se ita hasai Jezús husi Natál, saida mak sei hela husi Natál? Festa mamuk ida. Imi keta hasai Jezús husi Natál: Jezús mak sentru Natál nian, Jezús mak Natál loloos! Imi komprende?”