Husi komunidade Laga

Laga – Hodi selebra tinan Fiar nian, FMA ho ninia Oratóriu husi sentru lima (Maria Auxiliadora – Buigira, Don Bosco- Teki Naumata, Madre Mazzarello – Binagua, Laura Vicuna –Tomagua no  Domingos Savio – Waiaka), hala’o Kampu Bibliku iha loron 17-18 Agostu 2013. Labarik no joven sira ne’ebé partesipa ba kampu Bibliku ida ne’e hamutuk ema nain 353. Tema prinsipál ba kampu Bíbliku ida ne’e foti husi S. Jerónimo nia lifuan “Ema ne’ebé la hatene Eskritura la hatene Kristu”.

Atividade sira ne’ebé tulun sira atu hakle’an sira nia koñesimentu kona-ba Jezús Kristu fahe ba parte haat:

Parte 1⁰: Itineráriu Bíbliku, ne’ebé hahú iha Nazaré no Belém, nu’udar uma ne’ebé nakloke hodi simu no fó fatin ba Maromak nia Oan liuhusi Maria no bibi-atan sira nia ezemplu. Itineráriu daruak kona-ba Jezús nia Batizmu no Apóstulu sira nia bolun iha tasi Tiberíadade, labarik sira hafoun sira nia profisaun batizmál no reza ba vokasaun ba moris konsagrada. Itineráriu datoluk haree liu ba Jezús nia Identidade loloos ne’ebé hatudu-An iha foho Tabor no milagre hirak ne’ebé Jezús hala’o ho kbi’it Maromak nian. Itineráriu dahaat kona-ba Jezús nia terus, mate no moris hias, no konfisaun fiar nian husi Senturiaun katak “Ema ne’e Maromak Nia Oan duni”. Itineráriu ikus nian kona-ba kbiit ne’ebé Apóstulu sira simu iha Pentekostes no halo sira aten brani haklaken Liafuan Di’ak ba ema hotu hodi fó batizmu ba ema sira hodi Aman, Oan no Espíritu Santu nia Naran.

Parte 2⁰: Reza ho Bíblia, konkretiza iha orasaun dadeer nian hodi fahe Maromak nia Liafuan

Parte 2⁰: Kuiz Bíbliku

Parte 4⁰: Animasaun no jogu sira

Iha oras lokraik, tuku 14.30, loron 18 fulan Agostu  2013, Komunidade FMA Beata Laura Vicuña – Laga hamutuk ho labarik sira iha orfanatu, labarik no foinsa’e sira husi Oratóriu sentru lima ho ninia animadór/a sira no mós ho sarani balun simu Ita Na’i- Feto “Maria Auxiliadora” ne’ebé hala’o daudaun ninia vizita iha komunidade sira Filhas de Maria Auxiliadora iha Timór iha okazaun tinan 25 fundasaun Institutu FMA iha Timor-Leste.

Bemvinda Inan doben, Virjen Maria Auxiliadora, mai Vizita ami nia komunidade no haraik bensaun wain mai ami. Ida ne’e mak lian Benvimda nian ne’ebé hato’o husi Irmán FMA ho komunidade tomak husi Laga.