“Natál mak surpreza kona-ba Maromak ida ne’ebé labarik, Maromak kiak ida, Maromak fraku ida, Maromak ne’ebé husik Ninia kbiit atu hakbesik ita ida-idak”.

Irmán, leigu no foin-sa’e doben sira,
Ita-nia Inspetoria foin hotu Programasaun ba tinan 2018 (2-4 Outubru) no iha tempu badak komunidade ida-idak sei hala’o ninia programasaun. Ha’u hein katak hotu-hotu (foin-sa’e, aman-inan no kolaboradór/a sira bele envolve iha prosesu ida ne’e ne’ebé husu mai ita kapasidade atu lee situasaun iha ne’ebé ida-idak hela bá no komprende, ho Maromak nia matan, oinsá haklaken Jezús nia Liafoun Di’ak ba ema sira.

Ami sente katak situasaun iha Timor no Indonesia, maibé mós iha mundu tomak, sai dezafiu boot mai ita ida-idak atu iha fiar metin liután ba Maromak no mós halo esforsu atu labarik no foin-sa’e sira nia edukasaun bele sai preokupasaun prioritária mai ita hotu.

Tinan ida-ne’e, Kongregasaun ba Institutu Moris Relijioza nian no Sosiedade Vida Apostólika nian hakerek dokumentu foun ida hodi foti inspirasaun husi ai-knanoik ne’ebé Jezús haktuir iha Mk 2,22 kona-ba tua foun no fatin foun. Maski dokumentu ida ne’e hato’o ba relijiozu sira, iha pasajen ida ne’ebé, tuir ha’u-nia hanoin, interpela ita hotu: “Ita tau matan ho domin ba tua foun ida-ne’e, no ita simu bolun atu fui nia ba ema hotu nia ksolok, liuliu ba sira ne’ebé kiak liu no ki’ik liu” (“Per vino nuovo otri nuovi”, n. 9). Iha liafuan hirak ne’e ita sente katak Maromak husu mai ita, iha hilin no liña asaun hotu ne’ebá ita sei hala’o atu la haluha ita-nia destinátariu privilejiadu sira, atu bele fiél nafatin ba karizma ne’ebé Don Bosco no Madre Mazzarello husik hela mai ita.
Reitór Mór nia vizita sei hamanas ita-nia laran hodi lori ita hotu atu sai evanjelizadór/a no edukadór/a tuir Maromak nia Futar Fuan.
Servisu di’ak ba imi hotu!

Tempu Adventu nian, ne’ebé ita hala’o daudaun, konvida atu moris ho atitude sira ne’ebé tulun atu haree Maromak nia prezensa iha moris loron-loron. S. John Newman husu ba ninia an:
“Saida mak vijilánsia?” no nia foti ezemplu ruma ne’ebé leno komprensaun ida ne’e. Imi hanoin bainhira imi hein belun ida no nia seidauk mai… imi sente saida? Ka bainhira tur iha meza ho ema sira ne’ebé imi la gosta: imi hein de’it katak tempu liu lalais atu hetan fali imi-nia liberdade! Imi hanoin bainhira moris iha ansiedade katak buat ruma bele mosu… ka imi hanoin bainhira imi-nia belun ka ema ne’ebé hadomi hela dook no oras-oras imi husu ba imi-nia an: “Agora nia sei halo saida? Nia sei di’ak ka lae?”.

Sentimentu maizumenus hanesan sei sente bainhira ita hein Kristu ne’ebé sei hiit An mai. Matan moris no neon na’i hamutuk ho Nia dehan katak ita la haluha buat ne’ebé liu ona, maibé ita hateke ba futuru, ba buat ne’ebé sei mosu. Se ita husik ita-nia fuan nia odamatan nakloke, Jezús sei hiit an mai atu hatán ba ita-nia dezeju no esperansa sira. Tinan kotuk, iha omilia Natál nian, Amu-Papa Francisco hateten katak: “Maromak, ne’ebé hadomi ita, dada ita ho ninia ternura, hodi moris kiak no frajil iha ita leet, hanesan ita ida. Natál mak surpreza kona-ba Maromak ida ne’ebé labarik, Maromak kiak ida, Maromak fraku ida, Maromak ne’ebé husik Ninia kbiit atu hakbesik ita ida-idak”.

Iha tempu ida ne’e, Maromak konvida ita atu la haluha sira ne’ebé ki’ik no kiak: Ninia dalan atu hakbesik ita liu husi frakeza, limitasaun, pobreza, se ita hakarak hetan Nia ita presiza tuir dalan sira ne’e no rekoñese Nia iha ema sira ne’ebé iha karakterístika sira ne’e. Ida ne’e ha’u-nia dezeju ba imi hotu: ba imi ida-idak ne’ebé ha’u hadomi no ba imi-nia família sira ha’u hato’o:

“BOAS FESTAS DO NATÁL”.

Ir Alma Castagna