Dili – Molok atu tama ba festa boot Nain Feto Imaculada Sala laek, loron 07 Dezembru, Antigos/as alunos sira  hamutuk 21 ne’ebe  hola parte iha retiro  Preparasaun ba festa Nain Feto nian ne’ebe ba dala uluk realiza hamutuk ho Antiga/o alunos Sentru Balide iha tinan ida  ne’e.

Iha retiro ne’e Ir. Julia Marçal fahe ho foinsae sira ne’e  kona ba Lectio Divina ne’ebe koalia kona ba  Nain Feto nia Anunsiasaun, foti husi Evanjellu Saun Lukas 1:26-38. Iha lectio nee Irmã Julia haklean liutan  kona ba Nain Feto nia atetude sira mak hanesan : “Rona ho Disponivel ba Maromak nia hakarak no Anjo nia akompanhementu ba Nain Feto”.  Iha aprofundamentu Maromak nia Futar lia fuan halo  foinsae sira reflete no fahe sira nia esperensia kona ba Maromak domin nain ne’ebe sira esperensia iha familia laran ho inan aman nia domin ne’ebe  halo sira deskobre liutan Maromak  nia domin ba sira ida-idak.

Nain feto mos enfrenta difikuldades oin –oin iha nia dalan moris nian, nia nunka desanima maibe Nia abandona an totalmente ba Maromak hodi hatan nafatin “ SIM hau mak ne’e”

Ojetivu husi retiru ne’e mak halo foinsae sira fila fali ba abut be matan fiar nian hodi oferese ba sira Sakramentu Konfesa, Sakramentu Eukaristia , rona Maromak nia futar lia fuan no kria ambiente familia nian entre ami FMA no foinsae sira.

Esperensia  husi Antiga Aluna Oratoriano Balide ( Selviana Baptitas) ne’ebe haktuir katak ho esperensia retiru tinan ne’e nian, liu –liu koalia kona ba Nain Feto modelo inan laran mos nian, ne’ebe halo nia reflete katak nuudar foinsae prezisa  atu  emita tuir modelo  Inan laran mos ne’ebe  selebra iha loron 8 Dezembru. Nain Feto nuudar inan laran mos ba ema kiak no mukit sira e modelo virtude pureza nian ba foinsae sira. Buat ne’ebe interesante ba ami foinsae sira mak ami nafatin sente madre sira nia hakbesik an ba ami hodi kria retiru furak ida ba ami atu ami hela nafatin iha Maromak nia prezensa liu husi sakramentu sira ne’ebe oferese ona mai ami.

Iha loron 8 Dezembru 2017, iha lokraik ami nudar komunidade foti inisiativa ida ba reza tersu hamutuk ho familia Senhor Moises Sousa Pedroso, hela fatin iha Aituri laran. Familia ne’e  uluk kedas kuda ona Devosaun boot ba Maria Auxiliadora. Ho Festa Nain Feto Sala laek nian ne’e  ami bele ba hamutuk ho familia hodi reza tersu e kria amizade ho sira hodi kuda Devosaun ba Nain Feto. Familia  ne’e mos pronto hakarak  sai membru ADMA hodi habelar liu tan Nain Feto Auxiliadora ba familia sira seluk.  Nuudar Nain Feto Auxiliadora nia oan feto sira, ita mos simu bolun atu habelar Devosaun ba Nain Feto hanesan Don Bosco dehan: “ Se mak tau laran metin ba Nain Feto nia sei haree  saida mak milagre.

(Ines Bartolo Freitas)