Dili – Iha ambiente Eskola Maria Auxiliadora, iha festa agradesimentu ba estajiáriu sira Universidade UNTL nebe halo sira nia prátika  hanorin iha eskola refere. Ho ida ne’e husi Eskola Maria Auxiliadora Diretora Me. Olga Belo, hodi profesór/a sira nia naran dala ida tan hakarak agradese wain ba dosente sira estudantes UNTL ninia konfiansa no laran metin, hodi haruka nafatin estudante sita atu halao sira nia prátika hanorin iha eskola Maria Auxiliadora. Madre tenik tan “Ami  Agradese ba dosente sira UNTL nian, tanba eskola hetan profit; tan ne’e tinan-tinan  sira sempre haruka estudante sira mai  halao sira nia estajiu ka prátika ensinu iha eskola Maria Auxiliadora.No ba ikus nian ami nafatin foti hela balun atu hanorin hela iha eskola ne’e. Ba tinan ida ne’e ami foti hela nain neen ba tinan 2018 nian”. Agradese dala ida tan ba dosente sira basa sira fó ba eskola Maria Auxiliadora, fó ida ne’ebé di’ak liu (the best) terbaik nian.

Madre sira no mestre/a sira mós agradese ba estajiáriu sira hotu ba sira nia prezensa tanba sai tulun boot ba eskola ida ne’e tanba sira la’ós de’it prátika atu hanorin maibé sira hanorin duni, maske sei matak ka nurak hela maibé ami professores halo sira hanesan seo sira iha tasi klaran husik imi nani mesak.  Ho sira nia dedikasaun, pontualidade, pronto simu koreksaun durante akompanamentu nian. Agradese mós ba sira nia disponibilidade no pasiensia tanba sira sente duni sira hola parte duni iha eskola ne’e. Nune’e pronto nafatin ba eskola nia ejizensia sira. Madre mós la haluha fó parabéns ba sira no tempu hanesan louva ka hahi sira ne’ebé iha jurusan Matematika, tanba, tebes duni sira hatene no domina didi’ak sira nia materia no hanorin mós ho fiar an tomak. Atu dehan de’it katak sira matenek duni; la dehan katak lae maibé matemátika tinan ida ne’e halo ahi duni. Tuir mai madre Olga mós promete ba estajiáriu sira katak sei reza ba sira atu sai professores ne’ebé util ba rai ida ne’e reza ba Espiritu Santu no santu/santa saleziana, liuliu ba NA’I-FETO MARIA AUXILIADORA ne’ebe’ nia kuadru husik hela iha eskola. Ida-ne’e mak rekordasaun husi universidade UNTL, no ema barak mak sei reza ba imi hotu. Ikus liu nudar rekordasaun, eskola Maria Auxiliadora fó ba estajiáriu sira  kalendáriu salezianu, Hananu ba Nia no Liafoun Di’ak atu nune’e bele haree ba kalendáriu no hodi lee mós Maromak nia Liafuan hodi bele sai familiár liután ho Maromak nia Liafuan iha família no mós iha fatin seluk ne’ebé ita boot sira hela bá.

Tuirmai ne’e, atu la lakon oportunidade di’ak  entre estajiáriu sira nain 12 ne’e, ida, reprezenta estajiáriu hotu husi fakuldade edukasaun arte no humanidade, ho naran HILARIO SOARES, hakarak agradese  ba eskola, hodi dehan: “Hanesan bain-bain ema dehan atu dezenvolve nasaun ida presiza rekursu umanu ne’ebé mak qualidade atu produz rekursu ne’ebé di’ak mak liu husi edukasaun. Eskola Maria Auxiliadora hola parte ba dezenvolvimentu nasaun nian, tanba ne’e bele simu estudante universitáriu hodi bele mai hala’o estájiu iha fatin ida ne’e. Hanesan mós matenek nain ida hateten: “Educação não muda o mundo, mas educação muda a pessoa e a pessoa muda o mundo”. Nune’e, edukasaun mak bele halo mudansa ba nasaun ida”. Nia agradese ba oportunidade di’ak no hariku liután sira nia esperiensia nu’udar edukadores nian.

(Grinalda da Costa)