Venilale – Ohin, 15 Agostu, solenidade Na’i-Feto nia Asunsaun, irmán Joaquina Gaio Martins, irmán Ana Manuela, irmán Albina do Carmo, irmán Miranda Cruz no irmán Ana Rosália Pereira fó sira-nia sin totál ba Maromak iha Institutu “Filhas de Maria Auxiliadora”.

Selebrasaun Eukaristia nian hahú iha tuku 9.45 no remata iha tuku 11.45. Fatin mak parókia “Sagrado Coração de Jesus” iha Venilale. Iha fórmula profisaun perpétua FMA nian, irmán promete atu saran nia an tomak ba nafatin hodi moris ho radikalidade “rahun-d’iak sira” Reinu Lalehan nian no votu kastidade, pobreza no obesiénsia.

 

Misa ne’e konselebra husi amululik na’in 9 no prezide husi D. Basílio do Nascimento. Iha ninia omilia D. Basílio hateten katak “ohin Uma-Kreda selebra ita ema nia glória no iha tempu ema ko’alia oioin kona-ba feto, ita selebra feto nia glória. Feto ne’ebé hetan glória ne’e mak Na’i-Feto ne’ebé Na’i hasae nia ba Lalehan, isin no klamar”. Ida-ne’e mós ita ema nia destinu. Biar ita sala-na’in bainhira hetan Maromak nia grasa mai husi Jezús Kristu nia Krús, “ita-nia glória sei rohan-laek”.

“Na’i-Feto sa’e ba Lalehan atu hatudu mai ita katak ita-nia dalan moris abanbairua nian mós mak ne’e”. Maibé, “sá loos sasukat ba Maria nia glória?”, Amu-Bispu husu. Hodi komenta irmán sira nia motto: “Na’i, Ita hatene katak ha’u hadomi Ita”, Amu-Bispu Basílio dehan katak, domin mak sasukat. Na’i-Feto rasik iha planu ona ba nia moris maibé, bainhira Maromka mai propoin ba nia, nia prontu husik nia vida iha Maromak nia liman tanba domin: “Ha’u-ne’e mak Na’i Maromak nia atan de’it atu halo tuir Ita nia hakaran”.

D. Basílio iha ninia enkorajamentu ba irmán sira ne’ebé ohin halo profisaun perpétua nia hateten katak “ita simu bolun atu sai sinál kontradisaun nian”. Ohin loron ema la fó folin ba vida konsagrada, katak ita la vale buat ida: “animál la folin liu iha mundu ne’e mak padre no madre sira” (E. Morris). Ita mak tenke buka sá loos sentidu ba ita-nia moris konsagrada ne’e. “Se Maromak bolu ita atu fó sasin moris ida-ne’e, ita mós folin buat ruma”.  Maski ema tau marka oioin iha ita-nia kotuk, ita mak tenke buka hatudu moris ne’ebé loos.

Fila fali domin nu’udar sasukat, D. Basílio foti Jezús nia Liafuan ba Pedro bainhira nia husu ba Pedro se nia hadomi Na’i no Pedro hatán katak loos duni nia hadomi. Ba domin ne’e Jezús husu nia konfirmasaun: “Hametin ó-nia maun-alin sira-nia fiar”.  Aleinde ne’e, Amu-Bispu husu atu sira-nia sasukat domin nian hatudu sai liuhusi kuidadu no atensaun ba vida espirituál, liuhusi disponibilidade ba servisu, liuhusi komprensaun kle’an loron ba loron vida relijioza FMA nian.

Ikusnian, bainhira selebrasaun remata nia fó  hanoin ba irmán perpétua foun sira katak ohin loron “mane balun hanoin katak sira mane loos bainhira konsege hasai madre ida husi konventu”. Nune’e, konvite ba konsagrada sira atu matan moris no sai neon-nain no hatene tau an iha fatin loos.

Madre Paola fali, agradese inan-aman no família, belun sira ne’ebé akompaña irmán sira ne’e, fó korajen no apoiu atu sira la’o bá oin iha sira-nia dalan. Ba sira nia fó rekomendasaun foti husi Papa Francisco nia liafuan ba Superiora jerál sira Vida Konsagrada nian iha Roma:  ““Atu ksolok fekundidade espirituál ne’e anima imi-nia ezisténsia; atu imi sai inan, nu’udar figura Maria-Inan no Kreda-Inan… imi mak íkone Maria no Kreda nian… Sá loos mak Kreda sei sai lahó imi? Sei kuran maternidade, afetu, laran-nurak, intuisaun inan nian!”.

Parabéns ba imi-nia korajen atu hatán ho sin definitivu no votus fidelidade nian to’o rohan.