Baucau – Loron profisaun perpétua ba irmán FMA na’in lima besik ba daudaun. Ba sira-nia preparasaun besik liu, sira halo retiru loron tomak iha Baucau ho D. Basílio nu’udar pregadór. Sira hahú sira-nia enkontru iha tuku 09.45 no remata ho missa tuku 7.00 kalan.

 

D. Basílio dezenvolve ninia pregasaun hodi foti no komenta pasajen  husi Surat S. Paolo nian ba Éfezo 4, 17-25. Pontu sira ne’ebé nia salienta mak lialoos, hafoun an, keta halo tuir mundu.

 

Tuir D. Basílio, “dezafiu boot ohin loron mak lialoos. Ohin loron lialoos la’ós buat ne’ebé lójika umana hatudu iha kakutak maibé lialoos mak buat ne’ebé maioria deside ka opinaun públika”. Ba ita lialoos mak buat ne’ebé ita simu husi Maromak nia Liafuan no buat ne’ebé Kreda hanorin ita atu fó sasin. Nune’e se ita haklaken lialoos la tuir ema nia opinaun ita hatene katak ita sei hetan kontradisaun. Ita sai testemuñu lialoos Jezús nian, ita sei sai kontradisaun.

 

“Ideia daruak mak liafuan hafoun-an, halo kle’an liután fiar atu sai metin liu iha fiar, matenek liu iha fiar, no halo ita livre liu iha ita-nia fiar, ita-nia kompromisu sira”, D. Basílio hateten. “Votus perpétua husi pontudevista dalan relijioza nian hatudu vida adulta iha fiar. Iha perigu ida katak relijioza ho idade boot sei hakarak kontinua sai adolexente, la iha preokupasaun atu renova matenek kona-ba fiar”, nia kontinua. Presiza estuda atu hafoun fundamentu fiar nian, importante ba vida adulta konsagrada. Presiza asimila Konstituisaun sira no integra iha moris.

“Keta halo tuir mundu” basá ita tenke sai masin ba mundu, la’ós tuir mundu. “Ohin loron, ema nia moris la iha valór liu”. Ita oho karik baleia ida, organizasaun  barak sei hakilar. Oho ema ida jornalista sira de’it mak hakilar, tanba sira tenke manán osan. Dezafiu seluk mak valór família nian ne’ebé la’ós ona ida uluk nian. Iha kultura Timór iha mós dezafiu kona-ba valór feto nian ne’ebé la forte.

Atu reflete D. Basílio fó pergunta tolu ba irmán sira: pergunta ida kona-ba “sá de’it obstákulu sira, impedimentu sira, difikuldade sira ba vida konsagrada nia sasin?” Pergunta daruak mak husu ba an rasik se ita preokupa ho fundamentu vida konsagrada nian bazeia ba S. Paulo nia liafuan ne’ebé dehan “ha’u hatene iha sé mak ha’u fiar”. Nune’e pegunta mak “Ha’u hatene sé ne’ebé ha’u fiar no sé ida ha’u nia an rasik?”. Pergunta datoluk mak “oinsá ha’u nia vida orasaun ka relasaun nian ho Maromak?”.

Ikusnian iha misa nia konvida irmán sira atu fiar nafatin iha Na’i ne’ebé promete ba Josué katak Nia sei la’o hamutuk nafatin ho nia, maski ita la haree Maromak. Nune’e lalika ta’uk ba frajilidade no difikuldade sira, basá husi ne’e mak Maromak eduka ita no lori ita atu hakbesik Nia ba beibeik.