Liturjia domingu daruak Adventu nian hato’o apelu ida atu hasoru malu hikas ho Maromak, ba konversaun. Husi nia parte, Maromak nafatin prontu atu oferese ba ema mundu foun liberdade nian, justisa no dame nian; maibé mundu foun ne’e sai realidade de’it bainhira ema aseita muda nia fuan, hodi loke an ba Maromak nia valór sira.

Iha leitura dahuluk, profeta anónimu ida husi tempu Ezíliu nian garante ba eziladu sira Jahwéh nia fidelidade no Ninia vontade atu lori Povu – liuhusi dalan fasil – ba rai liberdade no dame nian. Ba Povu, husi nia parte, Maromak husu atu hasai husi nia an toman sira komodizmu nian, egoízmu no auto-sufisiénsia nian no aseita atu konfronta, dala ida tan, ho dezafiu sira Maromak nian.

Iha Evanjellu, João Batista konvida ninia maluk sira (no ema husi tempu hotu) atu simu Mesias libertadór. Misaun Messias nian – João hateten – mak oferese ba ema hotu Maromak nia Espíritu ne’ebé haraik moris foun no halo ema moris iha dinámika domin no liberdade nian. Ema ne’ebé halo dalan konversaun, transformasaun, mudansa moris no mentalidade de’it mak bele hakbesik Maromak.

Leitura daruak hatudu ba parusia (loron ikus), Na’i Jezús nia fila hikas ba dala rua. Ita simu konvite ba vijilánsia – katak moris loron ba loron tuir Jezús nia hanorin, hodi haka’as an iha transformasaun no konstrusaun Reinu nian. Se sarani sira moris tuir dinámika kontínua konversaun nian, iha sira nia dalan nia rohan sira sei hetan “lalehan foun no rai foun iha ne’ebé justisa horik bá”.

Download