Prepara an atu dehan sin ba nafatin iha vida konsagrada

 

Irmán na’in 7 ne’ebé hala’o sira nia segundu novisiadu fulan ona, ohin remata sira-nia tempu  preparasaun besik liu ba profisaun perpétua. Defaktu husi sira na’in hitu, na’in lima sei hala’o sira-nai profisaun perpétua iha loron 15 Agostu 2013 iha Venilale. Na’in rua seluk foin mak halo fulan dahuluk segundu novisiadu no sei kontinua tinan oin ho fulan daruak.

 

Durante sira-nia tempu silénsiu no reflesaun nian sira buka atu

 

• Halo avaliasaun kona-ba ha’u-nia haka’as an atu konsagra no forma ha’u-nia an atu nune’e bele hametin ha’u-nia dezisaun atu hili Maromak iha Institutu hodi kompara ho valór sira mai husi FMA nia vokasaun.
• Halo esperiénsia kona-ba enkontru loos no kle’an ho an rasik, ho ema seluk no ho Maromak, iha ambiente orasaun, konfrontu no dixernimentu nian.
• Iha simplisidade no fraternidade, favorese konfrontu no avaliasaun tinan hirak profissaun nian, hodi fahe esperiénsia sira.

Iha loron ikus enkontru nian sira fahe kona-ba katak sá “profisaun peroétua”.

“Profisaun perpétua katak saran ha’u-nia moris ba de’it Kristu hodi serví de’it Nia liuhusi misaun ne’ebé ha’u simu no ha;a’o (irmán Ana Manuela da Costa).

“Profisaun perpétua mak resposta definitiva fidelidade nian ba Maromak hodi serví maun-alin sira tuir Fundadór nia projetu” (Irmán Joaquina Gaio).

“Ba ha’u profisaun perpétua mak ha’u-nia hatán sin halo ho domin no liberdade; ha’u halo aliansa ho Maromak no hakarak sai ida de’it ho nia oan Jezús nafatin ba nafatin iha ha’u-nia moris tomak; atu serví labarik no foin-sa’e sira ne’ebé presiza liu, tuir Don Bosco no Madre Mazzarello  nia karizma (irmán Ana Rosalia Pereira).

“Votu perpétua mak momentu grasa nian no úniku liu ba ha’u atu kesi aliansa domin nian ho Maromak ne’ebé bolu ha’u hodi hatán ba Nia ba nafatin. Ne’e duni, ho votu ida-ne’e husu mai ha’u atu moris ho radikalidade ha’u-nia saran an ba Maormak no ba Kristu iha ksolok no domin. Nune’e bele hola parte liután iha nia misaun salvasaun nian hodi moris tuir Don Bosco no Madre Mazzarello nia karizma (irmán Miranda da Cruz).

“Ba ha’u signifikadu votus perpétuu nian mak desizaun radukál ida ne’ebé ha’u halo ho liberdade no laran-luak tomak iha Maromak no ema hotu nia oin atu saran an tomak ba nafatin ba Maromak no serví Nia liuhusi labarik no foin-sa’e sira iha ha’u-nia misaun tuir karizma salezianu… Mesak ha’u kbiit-laek maibé laran metin no abandona an ho fiar hodi sadere ba Maromak nia fidelidade no irmán maluk sira nia tulun no apoiu, ha’u la’o bá oin ho aten-barani iha ha’u-nia moris konsagrada (irmán Albina).

Irmán na’in rua ne’ebé foin hahú fulan dahuluk segundu novisiadu nian sira fahe mós sira-nia reflesaun:

“Segundu novisiadu mak momentu ne’ebé ha’u konfronta an fali ho ha’u-nia esperiénsia sira durante tinan hirak ne’e no prepara an atu fó resposta ba Ida-ne’ebé ha’u hili ba nafatin (irmán Jacinta de Deus).

“Segundu novisiadu mak momentu preparasaun atu hatán ba Na’i nia bolun ba nafatin. Iha momentu formasaun nian ne’e, hafanun fali ha’u atu hateke ba esperiénsia ne’ebé hala’o tiha ona iha dalan moris nian (irmán Dolores Ribeiro).