Dili – Formasaun ikus nian ba diretora sira iha tinan ne’e nia tema mak “Íkone bíblika autoridade sira-nian”, hala’o iha loron 1 Dezembru.

Entre íkone sira ne’ebé hatudu tipu servisu autoridade nian mak “Família foun hamutuk ho Jezús” (Mc 3,31-35); “Espíritu Santu hun ba komunidade (Apóst 2,1ss);  “Komunidade dixípula no misionária” (Mc 3,13-15); “mediasuan komunitária” (Lc 12,41-48).

Depoizde simu input husi Ir Alma Castagna (provinsiál), nia husu atu ida-idak reflete kona-ba pergunta sir ahanesan tuirmai ne’e: 1) Ida-ne’ebé mak reprezenta di’ak liu ó-nia esperiénsia kona-ba autoridade no tanba sá?; 2) Íkone ida-ne’e husu atitude saida de’it? 3) Oinsá ha’u bele simu tulun atu moris tuir atitude ne’e?”.

Reflete mesak tiha, Irmán sira fahe iha grupu tuir íkone ne’ebé sira hili. Fahe tiha iha grupu mak aprezenta fali ba asembleia.

Ba Irmán sira grupu “família” nian, ba sira komunidade mak família ida ne’ebé Maromak halibur iha Kristu.  Fiar mak anima komunidade ida-ne’e maski dalaruma iha ai-tarak maibé iha mós ai-funan., iah susar maibé iha mós ksolok relasaun fraterna nian, loke an, partilla, sente hola aprte no fó an tomak. Atitude ne’ebé presiza iha mak firmeza, pasiénsia haraik-an, simplisidade. Iha famíli ita presiza valoriza ema ida-idak nia prezensa liufali ninia serbisu. Atitude seluk tan mak resiliénsia, katak kbiit atu tahan hasoru difikuldade no persevera. Konserteza orasaun importante no moris iha fidelidade ba karizma.

“Komunidade nia orijen mak Espíritu Santu”, maibé uluknanai tenke haree iha Irmán ida-idak prezensa Espíritu Santu nian. Nu’udar animadora presiza hakonu an ho Espíritu Santu atu dixerne Maromak nia hakaran, Nia mak gia loloos. Atitude ne’ebé presiza iha atu serví mak haluha an rasik, serví, abandona an ba Maromak, dosilidade. Presiza sai feto orasuan nian atu konfronta nafatin ho Jezús ninia modalidade autoridade nian, kria ambiente família nian, relasaun no iha atitude materna. Karizma sira mak don Espíritu nian nune’e presiza husu Espíritu atu ilumina ita atu deskobre Irmán sira-nia don sira.

Atu haklaken uluknanai tenke hela ho Na’i. Ne’e mak komunidade dixípula-misionária ninia karakterístika, sente hola parte ba Naa’i ba Kreda, ba Institutu no komunidade. Ba ne’e presiza aprende atitude Na’i-Feto nian, atitude Bibi-Atan Di’ak nian, halo pasu dahuluk atu hakbesik, lakon an rasik, haraik-an, la kaer metin kultura ida no partisipasaun másima ba Kreda nia vida sakramentál.

Nu’udar animadora ne’ebé sai mediadora komunitária, halo atu animadora iha atitude “atan” nian ne’ebé labele foti fali Na’i nia fatin, atu la uza podér tuir lójika  protagonizmu pesoál nian. Nune’e animadora orienta, koordena misaun atan hotu nian. Maski nune’e, nia mak asume responsabilidade ikus no tenke deside. Importante atu sai nafatin ema iha relasaun metin ho Na’i no iha konfiansa ba Irman sira. Atitude importante  sira mak fidelidade iha fraternidade, ksolok, esperansa, no halo domin sai lei boot liu hotu, no labale la iha saran an tomak ba Maromak.

Aleinde formasaun, Irmán Diretora sira mós haree fali lala’ok no knaar sira ba programasaun 2018, no taka ho kumprimenta malu ba Natál, liuliu ba provinsiál ne’ebé sei la hela iha Inspetoria to’o tinan foun 2018.