Peregrinasaun Na’i-Feto nian iha Fuiloro

Husi irmán Ines Bartolo

Fuiloro – Komunidade FMA Fuiloro  simu Na’i-Feto husi kedas loron 27 Jullu 2013 liubá. Peregrinasaun Na’i-Feto nia ilas ne’ebé akompaña FMA sira iha inísiu prezensa iha Timor-Leste tinan 25 liubá –  presizamente iha loron 2 Outubru 1988 – hahú kedas iha fulan Maiu no vizita ona komunidade FMA neen: haat iha Dili, komunidade iha Kailaku no komuidade FMA iha Baucau. Tinan 1988 mós tinan sentenáriu Don Bosco nia fila hikas ba lalehan, ne’ebé fó nu’udar prezente nia oan-feto sira, ba rai Timór.

 

Prezensa Na’i-Feto nian dada sarani barak zona Fuiloro nian atu hakbesik Jezús. Entre Aleinde loroloron iha ema ne’ebé mai fó onra ba Na’i-feto ho modu pesoál, nu’udar família, iha mós grupu sira. Loron kinta ne’ebé komunidade dedika ba adorasaun sai oportunidade ba sarani hotu atu halibur hamutuk hodi reza rozáriu no hafoin halo adorasaun ba Jezús iha  Santíssimo Sakramentu.

Ho Nain Feto Ausiliadora nia prezensa  bele  hamanas liután povu sira nia fiar no devosaun  ba  Jezús no Maria.  Bele haree katak sarani sira apresia tebes momentu hamutuk ne’e no tuir ho devosaun boot momentu orasaun sira-ne’e.

Loron kuarta, 7 Jullu la’ós membru sira polísia nian mós mai nu’udar grupu atu reza rozáriu ba Na’i-Feto. Sira hotu partisipa ho fuan tomak, hahú husi komandante to’o pesoál baibain.

Horisehik, iha adorasaun sarani ne’ebé prezente hetan mós oportunidade atu hakle’an Maromak nia Liafuan foti husi epizódiu Na’i Jezús nia milagre iha festa Kaná hodi nakfilak bee ba tua, liuhusi Na’i-Feto nia intersesaun.  Iha lectio foka katak Maria lori ita ba Jezús: “Imi halo buat hotu ne’ebé Nia sei dehan ba imi”. Bainhira ita halo tuir Maria nia konsellu, ita sei haree milagra: ita-nia tristeza sira, ita-nia susar sira, ita-nia problema sira sei hetan roman foun, sei nakfilak ba ksolok, ba hakmatek, ba konfiansa. Hanesan iha festa Kaná bee ne’ebé nakfilak ba tua, tanba atan sira rona Jezús hodi hakonu kusin sira ho bee.

Tuir irmán sira iha Fuiloro, esperiénsia Na’i-Feto nia vizita ne’e lori ema barak hakbesik ba Jezús. Sira haree katak povu Fuiloro hadomi Na’i-Feto Ausiliadora nu’udar Inan no Tulun ba sira-ida-idak.