Dili – Iha loron 25-30 Novembru Irmán Diretora foun hahu sira nia formasaun iha Comoro, Casa Provincial FMA.  Me.Alma Castagna,FMA, Superiora Provinsiál TIN mak diretamente fó formasaun ida ne’e. Liuhusi artigo konstituisaun No.79 tulun no gia inkontru formasaun ida ne’e iha Espiritu santu nia roman no tuir modelu no gia husi atitude Maria nian. Diretora foun sira mak: Ir. Áurea Marçal Freitas (Sumba-Palla), Ir. Angelita Gomes (Komunidade Beata Laura Vicuna-Laga), Ir. Virgilia Marçal (Kom. Beata Maria Romero-Kailaku), Ir. Sanzinha de Jesus (Santa Teresa d’Avilla-Baucau) no Ir. Jacinta Gusmão (Kom. Sta.Maria Mazzarello-Venilale). Irmán nain 3: Ir.Jacinta, Ir. Sanzinha no Ir. Virgilia, halao tiha ona sira nia knaar nu’udar superiora maibé tanba seidauk iha formasaun enkuantu I. Angelita no Ir. Áurea atu hahú hala’o knaar ida ne’e.

Tema sira ba formasaun kona-ba: Aspetu bíbliku autoridade nian, kategoria enkontru nian, serbisu autoridade no dalan fiar nian, diretora mak feto kontemplativa no akompañamentu no kolókiu.  Iha formasaun ida-ne’e Neo Diretora sira simu mós informasaun no formasaun husi Ir. Veronica Kusnadi, Sekretária Inspetoria nian ne’ebe ko’alia kona-ba oinsá hakerek “cronaca” no konserva dokumentu sira Kreda no Institutu iha komunidade. Ir. Carmen Bravo, Ekónoma Inspetoria nian aprezenta kona-ba kolaborasaun Diretora nian ho ekónoma lokál ba misaun no komunidade ninia moris tuir artigu sira husi Konstituisaun no Regulamentu. Iha loron ikus Me. Gianna Spaggiari, misionária no superiora tinan barak iha Brasil no oras ne’e daudaun iha Timor, fahe ninia esperiensia nu’udar superiora nu’udar sujestaun no lisaun ba ami ida-idak. Ho fuan nakonu ho gratidaun no orasaun ami agradese tebes ba Me. Alma Castagna, ba ninia dedikasaun, ksolok, laran manas no laran diak hodi halo formasaun ida ne’e sai furak no kria ambiente hakmatek no serenu hodi favorese Irmán ida-idak atu fahe sira nia reflesaun.

Tuir mai ha’u mak reflesaun badak husi Irmán diretora foun balun:

• Formasaun sira ne’ebe ha’u simu iha loron hirak ne’e halo ha’u haksolok tebes tan iha bukae domin nian husi Institutu ne’ebe akompaña ha’u to’o fó an tomak atu serbí la’os atu ema serbí. Halo ha’u mós realiza ha’u nia an katak ha’u laiha buat ida, ha’u la hatene buat ida, ha’u la halo buat ida. Buat hotu Maromak Nia kbiit no grasa. Ho razaun ne’e ha’u agradese ba Me.Alma no Irmán sira seluk ne’ebe fahe esperiensia ho ha’u. Ha’u entrega ha’u an iha Maria Auxiliadora nia liman. (Ir.Virgilia)
• Ha’u agradese Maromak ba buat hotu Nia halo iha ha’u nia moris. No ha’u hakarak fahe Ninia domin no laran diak ba ema seluk liuhusi ha’u nia Irmán maluk sira iha komunidade, labarik no foin-sá’e sira ho domin degrasa. Agradese ba Institutu nia akompañamentu no laran metin mai ha’u. Ha’u fiar katak “Maromak hili, Nia sei fó kbiit”. (Sr.Angelita)
• Liuhusi formasaun sira durante loron sira ne’e prepara ha’u atu toma responsabilidade ne’ebe Institutu ne’ebe laran metin mai ha’u ho objetivu ida deit katak atu serbi malu nu’udar bin-alin iha komunidade no misaun hodi serbisu hamutuk ba misaun salvasaun klamar sira nian.(Sr. Áurea)

(Angelita Gomes)