Dili – Komunidade S. João Bosco, Balide (Dili), ohin, 27 Novembru simu diretora foun Ir Evangelina Xavier, ne’ebé obediénsia transfere husi komunidade Laura Vicuña, Laga, ba Dili.

Ir Evangelina Xavier tama iha komunidade akompaña husi Ir Alma Castagna, provinsiál, no hetan simun eh resesaun husi Irmán, postulante no menina larista sira ho ksolok. Depoizde benvinda dahuluk ho tebe eh dansa no knananuk, kontinua kedas ho orasaun. Orasaun atu simu diretora foun ne’ebé Ir Alma rasik mak prepara, subliña domin no espíritu família nian, atu oinsá kria ambiente edukativu ida iha-ne’ebé foin-sa’e sira no Irmán sira bele esperiénsia kona-ba domin.

Durante orasaun iha jestu simbóliku rua: ida entrega lilin husi Provinsiál ba Diretora atu nia gia komunidade hodi roman Maromak nian, halo fiar no domin nabilan nafatin iha komunidade ida-ne’e; jestu daruak mak Irmán ne’ebé joven liu iha komunidade entrega ba diretora foun “xave” ki’ik-oan ida, símbolu loke an nian ba diretora foun, hanesan Ir Alma ne’ebé prepara orasaun ne’e esplika:

“Ho jestu ida-ne’e ida-idak dehan, ha’u hakarka loke ha’u-nia fuan ba Irmán ne’ebé agora Maromak tau  nu’udar superiora iha-ne’e”. Xave ki’ik-oan atu dehan katak “la presiza hahalok boot atu moris iha klima ksolok nian, simu-malu nian. Ita-nia hahalok loroloron nian ki’ik-oan bele loke ita-nia fuan atu simu malu”, Ir Alma hatutan. Hafoin nia mós membru sira komunidade ne’e nian atu durante jestu ne’e, sira “ida-idak entrega ninia an ba Maromak atu nia bele tulun ida-idak atu loke an ba Niania hakaran liuhusi diretora foun”.

Benvinda Ir Evangelina no Na’i nia unsaun Espíritu nian ó bele sai gia, inan no biin ida ba sira-ne’e Nia entrega ba ó. Atu ó-nia prezensa nu’udar tali komuñaun nian halo atu fiar no domin ne’ebé halakan ona iha uma ida-ne’e bele nabilan liután.

(Redasaun)