Venilale – Komunidade Santa Maria Mazzarello Venilale, iha komemorasaun mensál ba ita Inan Maria Auxiliadora nian (24.11.2017), simu ho ksolok Diretora foun, madre Jacinta Gusmão ne’ebé ho ofisialmente simu knaar foun atu anima iha komunidade ne’e. nune’e ho entuziasmu no ksolok Irmán, profesór/a, kolaboradór’a alunu/a sira no grupu ADMA  simu madre ofisialmente liu husi madre Alma ne’ebé mai husi Dili atu aprezenta diretora foun ba komunidade. Ami nia ksolok ne’e hatudu liu husi dansa husi alunu’a ne’ebé reflete kona ba Evanjellu Mateus kap.  14:22-33 no knananuk simples ida iha ne’ebé ita hotu sei sai ida deit, sai belun ba malu iha ne’ebé ksolok no dame mak hamutuk ho ita no atu Na’i Nia grasa hamutuk ho madre ba nafatin.

Iha ninia mensajen, konfronta ho Evanjellu kona-ba Pedro ho maluk eskolante seluk, hotu-hotu peskadór no hatene sira-nia knaar, Ir Alma, provinsiál FMA hateten katak ita, la’ós presiza diretora tanba la hatene ita-nia knaar. Ir Alma hateten katak, funsaun diretora nian mak “kria unidade, tulun Irmán sira, imi, profesór/a sira servisu hamutuk, favorese atu iha ambiente di’ak atu bele hatán ba Maromak. Ida-ne’e mak knaar diretora nian. La’ós katak nia la iha ema hotu beik de’it. Maibé nia mak ajuda ema hotu atu fó buat ne’ebé di’ak liu husi an rasik. Imi hili pasajen ida ne’ebé Pedro arraska didi’ak…Nia halo an didi’ak depois mout. Ida-ne’e atu fó hanoin ba imi katak  diretora ema ida hanesan ema sira seluk, hanesan imi: ho ninia frakeza no matenek, ho ninia kapasidade no limitasaun. Ida-ne’e husu ba imi atu simu malu no atu komprende malu, atu la hanoin katak nia so’i imi ida-da-idak, maibé ida ne’ebé tulun imi atu loke dalan ba Jezús”.

Atu hala’o knaar ne’e presiza roman Maromak nian, “tanba ne’e, – Ir Alma hatutan – ha’u entrega ba nia lilin ida. Lilin ida-ne’e fó hanoin katak naroman mai husi Maromak, naroman mai husi Espíritu Santu. Maibé ha’u fó ba nia. Tanba nia tenke ajuda ema hotu haree naroman ida-ne’e. Nia mak ida-ne’ebé iha momentu sira karik nakukun nian tenke barani foti sae naroman ida-ne’e  atu dehan katak Jezús iha ita leet.”.  Hanesan Pedru, ita hotu prezisa Jezús Nia liman atu dada sai ita husi bee boot ne’ebé dala barak halo ita mout.

Ikusmai Ir Alma konvida atu reza ba nia no ba membru komunidade edukativa hotu, ba ema ida-idak, tanba “diretora mesak labele halo buat ida, atu hamutuk buka Maromak nia hakaran iha Venilale ida-ne’e no hamutuk haroman situasaun sira, ema sira ne’ebé iha susar laran, haroman ho roman ne’ebé mai husi Jezús”.

Momentu  forte orasaun iha selebrasaun simples, ami hamutuk hasa’e ba Maromak ami nia fuan tomak hodi husu grasa atu Madre Jacinta iha ninia servisu animasaun nian nafatin iha Maromak nia grasa no fundadór/a sira nia Espíritu. Liuliu atu sai hanesan konstituisaun hateten: “Diretora mak tali uniaun nian, nia buka atu kria iha uma klima Evanjéliku, ne’ebé tulun atu sente iha familia, no atu kolabora ho modu e spontáneu iha misaun komun”.
Depoizde entrega lilin, taka ho knanauk ba Na’i-Feto Auxiliadora, basá ohin 24 Novembru mak loron komemorasaun ba Nia.

OBRIGADA BARAK BA MADRE NIA “SIM” HANESAN MARIA  NE’EBÉ PRONTA NAFATIN BA NIA OAN SIRA NIA DI’AK.

(Yashinta H. Bria)