Tema domingu XIX Tempu Komún nian

Maromak nia Liafuan ne’ebé liturjia ohin propoin mai ita konvida ba vijilánsia: eskolante loos la dobra liman de’it, iha ezisténsia ida komodizmu no rezignasaun nian, maibé matan-moris nafatin no disponivel atu simu Na’i, rona ninia apelu sira no harii “Reinu”.

Leitura dahuluk aprezenta mai ita liafuan “ema matenek” anónimu ida, iha-ne’ebé atitude ba valór sira Maromak nian mak fó moris no ksolok. Komunidade israelita – hodi konfronta an ho mundu pagaun no imorál, ne’ebé la simu valór sira ne’ebé harii komunidade Maromak nia Povu nian – tenke sai komunidade “vijilante” ida, ne’ebé konsege dixerne entre valór efémeru sira no valór duradouru sira.

Leitura daruak aprezenta Abraaun no Sara, modelu fiar nian ba fiar-na’in sira tempu hotu nian. Matan moris ba Maromak nia apelu, sira konsege deskobre soin futuru iha limitasaun no frajilidade vida prezente nian. Ida-ne’e mak atitude ne’ebé autór Surat ba Ebreu sira rekomenda ba fiar-a’in sira, ho modu jerál.

Evanjellu aprezenta katekeze ida kona-ba vijilánsia. Nia propoin ba eskolante sira tempu hotu nian atitude ida hein nian iha hakmatek no matan moris ba Na’i, ne’ebé mai hasoru ita atu liberta ita no hatama ita iha dinámika ida komuñaun nian ho Maromak. Eskolante loos mak ida-ne’ebé nafatin prepara an atu simu Maromak nia don sira, atu hatán ba ninia apelu sira no haka’as an iha kontrusaun “Reinu” nian.

Download