Cailaco- Loron 24 Novembru 2017 marka tan istória furak ida iha Cailaco tanba iha loron ne’e ba dala uluk pre-eskolár ne’ebé hamahan-an ho protesaun S. Domingos Savio halo graduasaun. Graduasaun hahú ho Missa agradesimentu ne’ebé realiza iha loron 23 loraik prezide husi pe. Norberto no partisipa husi sarani sira, inan-aman no família sira husi labarik sira.

Labarik sira ne’ebé halo graduasaun hamutuk 10. Kuantidade uituan tanba foin primeira vez akontese iha Cailaco labarik sira halo graduasaun, nune’e hein katak  ida ne’e sei loke dalan ba grupu sira tuir mai no bele sensibiliza inan-aman sira atu fó importánsia ba edukasaun oan sira nia iha nivel ne’ebé báziku liu.

Labarik sira hotu kontente inklui inan-aman no família sira sente orgullu hodi asiste sira nia oan. Tuir mai espresaun ksolok husi inan aman sira :

Sra. Albertina hateten: “Ha’u sente kontente tanba ha’u nia oan  bele remata ona nia studu nivel baziku nian. Ha’u iha esperansa katak edukasaun ne’ebé nia simu bele influensia nia atu dezenvolve-an iha futuru. Esperiénsia husi edukasaun furak ne’ebé nia hetan sei halo nia iha vontade nafatin atu kontinua aprende.

Espresaun husi graduadu Miguel nia aman: “Obrigadu ba mestra sira no madre sira ne’ebé akompaña ona ha’u nia oan too iha momentu ida ne’e. Ba ha’u sai orgullu boot  ida ba ami Kailaku oan sira tanba primeira vez ami asiste serimónia ida hanesan ne’e. obrigada ba imi nia domin no interese ba ami nia oan sira.

Amu Norberto iha nia mensajen hateten katak ita nia ksolok mak hodi haree labarik kiik sira nudar futuru Kreda no nasaun iha mudansa  iha sira nia-an rasik liu-liu parte intelektualmente. Nia husu atu inan-aman sira kolabora nafatin atu bele dezenvolve diak liutan oan sira nia koñesimentu iha parte edukasaun nian. Nia mós agradese ba Me. Tania ba ninia dedikasaun no sakrifisiu hodi tulun no akompaña labarik sira too iha momentu ida ne’e.

Husi espresaun hirak ne’e hatudu katak sira iha esperansa boot ba oan sira nia futuru  no ba ita FMA sira katak knaar no apostoladu   saida de’it mak ita halao nafatin nuudar asaun edukativa. Ita hotu iha esperansa ida de’it katak joven no labarik sira  ne’ebé ita eduka ita bele manan sira nia klamar hodi lori ba Maromak no atu sira bele hetan futuru ne’ebé diak. Mai ita reza ba malu nafatin hodi suporta malu atu ita nia prezensa sai nafatin espresaun domin Maromak nian ba foin-sa’e no labarik kiak sira iha periferia sira ne’ebé ema la tau matan.

(Albina do Carmo)