RV / Redasaun – “Saida mak Missa?” Ne’e mak pergunta ne’ebé gia Papa Francisco nia katekeze iha kuarta, 22 Novembru iha Prasa S. Pedro. Tema mak “Missa, memoriál mistériu paskál Kristu nian”.

“Missa mak memoriál Mistériu Paskál Kristu nian. Nia halo ita partisipa iha ninia vitória  hasoru salan no mate no fó signifikadu nakonu ba ita-nia vida”, Papa Francisco hateten.

Santa Missa_3 (Port)

Amu-Papa Francisco destaka katak, atu komprende signifikadu Missa nian presiza komprende signifikadu bíbliku “memoriál” nian, ne’ebé la’ós de’it rekordasaun kona-ba eventu uluk nian, maibé halo sai prezente no atuál.

“Eukaristia lori nafatin ita ba Maromak nia asaun salvasaun nia tutun: Na’i Jezús, hodi halo paun ne’ebé silu mai ita, hasuli iha ita-nia leten ninia mizerikórdia no ninia domin tomak, hanesan Nia halo iha krús, hodi hafoun ita-nia fuan, ita-nia ezisténsia no ita-nia modu relasiona ho Nia no ho maun-alin sira”.

Amu-Papa subliña katak partisipa iha Missa, ho modu partikulár iha domingu-domingu, signifika tama iha Na’i moris-hi’as nia vitória, husik nia roman leno. No liuhusi selebrasaun eukarístika, Espíritu Santu halo sarani sira partisipa iha vida divina ne’ebé iha kbiit atu nakfilak ema mortál sira. “Iha ninia pasajen husi mate ba moris, husi tempu ba eternidade, Na’i Jezús lori ita ho Nia atu halo Páskua. Iha Missa halo Páskua”.

Papa Francisco enfatiza tan katak Kristu nia Páskua mak vitória definitiva hasoru mate no, iha Eukaristia, Nia hakarak komunika domin paskál ida-ne’e, domin ne’ebé manán. “Se ita simu Nia ho fiar, ita mós bele hadomi loloos Maromak no maluk, ita bele hadomi hanesan Nia hadomi ita, hodi haraik moris”.

“No bainhira ita bá Missa hanesan ita bá Kalváriu, hanesan de’it. Maibé imi hanoin bá: se ita bá Kalváriu – ita hanoin hodi uza imajinasaun – iha momentu ida ne’ebá, ita hatene katak ema ne’e Jezús. Maibé, ita permiti ita-nia an atu ko’alia ba malu, hasai fotografia sira, halo uitoan espetákulu? Lae! Tanba nia mak Jezús! Ita, konserteza sei horik iha silénsiu, iha tanis, no mós iha ksolok tanba simu makso’in. Bainhira ita tama iha Igreja atu selebra Missa, ita hanoin ida-ne’e: ha’u tama iha Kalváriu, iha-ne’ebé Jezús fó nia moris mai ha’u, no nune’e sei lakon espetákulu, lakon ko’alia ba malu, komentáriu sira, no buat sira-ne’e hadook ita husi buat ne’ebé furak liu iha Missa, Jezús nia triunfu”.