Memória litúrjika Aprezentasaun Maria nian iha Templu ninia abut no fundamentu mak tradisaun ebreu sira-nian no iha faktu katak, hanesan Ebreu oan sira hotu ne’ebé tuir sira-nia relijiaun loloos, Joaquim no Ana, Maria Virjen nia aman-inan, hanesan ikusmai Jezús nia Inan rasik mós halo, lori Maria ki’ik-oan, atu oferese ba Na’i, hodi oferese manu lakateu eh manu falur rua.

Festa ne’e hakarak hanoin hikas mós períodu husi Maria nia moris to’o ninia noivadu ho José no anunsiasaun. Hodi selebra festa ne’e Kreda lori ba roman silénsiu kona-ba Maria nia moris iha períodu dahuluk no aprezenta ida-ne’e nu’udar tempu preparasaun nian ba vokasaun aas Maromak nia Inan nian.

Kreda, husi kedas tempu primeiru sira, venera Maria nia santidade aas no refere ba nia pasajen bíblika lubuk ida Testamentu Tuan nian, iha-ne’ebé aprezenta Maria nu’udar “Matenek nia horik-fatin iha ema sira nia leet”: iha perspetiva ida-ne’e ita hanaran nian “Sede de Sapiência” (Matenek nia tur-fatin), tanba iha nia Maromak nia Sabedouria/Matenek katak Kristu horik bá, no iha nia hahú atu manifesta Maromak nia kmanek sira, ne’ebé Espíritu hala’o iha Kristu no iha Kreda.

Nu’udar Maromak nia Templu, ita kumprimenta Maria la’ós de’it nu’udar fiar-na’in sira nia Inan, maibé mós nu’udar Feto tempu foun sira-nian, tanba iha Nia kumpri tiha profeta sira nia promesa sira no, liuhusi Nia, Espíritu Santu lori ema iha komuñaun ho Maromak.

“Iha Maria, Espíritu Santu manifesta Aman nia Oan-Mane ne’ebé sai Feto Virjen nia Oan-Mane.  Nia mak ai-hun ne’ebé lakan teofania definitiva nian: nakonu ho Espíritu Santu, nia hatudu Liafuan [Verbu]  iha ninia hariak-an no iha nia isin no halo koñese ba ema kiak sira no ba povu uluk sira” (Catecismo da Igreja Católica. 724).

Hodi hanoin Na’i-Feto Virjen Maria nia Aprezentasaun iha Templu, importante medita ligasaun metin liu ne’ebé eziste entre Maria no Igreja, ida ninia santidade folin boot ne’e. Hateke ba Nia signifika hateke ba modelu nabilan liu vida sarani nian, ne’ebé la obedese de’it ba Lei, maibé sai pontu referénsia ba ita-nia la’o, ita-nia ain-hakat sira iha Na’i nia Templu, katak Kreda

Konsíliu Vaticano II hateten: “Kristu nia fiél sira haka’as an atu sai boot liután iha santidade ba vitória husi salan; no tanba ne’e sira foti matan ba Maria, iha-ne’e nabilan nu’udar modelu virtude nian iha komunidade tomak sira ne’eb’e Na’i hili nia oin” (Lumen Gentium 65).

Ita labele haluha katak, 21 Novembru, iha festa Aprezentasuan iha Templu, selebra mós Loron Irmán sira moris iha Klauzura nu’udar konvite ba gratidaun ba Irmán sira ne’e, ne’ebé moris sira-nia konsagrasaun iha orasaun, iha meditasuan no iha helik-an. Irmán sira-ne’e, antena loloos iha Na’i nia foho, horik iha Kreda nia fuan no hariku nia ho sira-nia virjindade no orasaun ne’ebé la para. Lahó sira Kreda sei sai kiak liu!

Mai ita Irmán Saleziana sira, loron ne’e ita harohan ba formande sira ne’ebé hakarak saran an ba Maromak, atu banati Maria Virjen nia  “sin”.