Mensajen husi Provinsiál

Irmán doben sira,

Ha’u hakerek ba imi iha vijília festa loron 5 Agostu nian, data ida grasa nian no eventu ida komuñaun boot nian.

Ita hamutuk ho La Madre iha uniaun kle’an no irmán hotu husi kontinente lima, nu’udar Família ida Maria nian tomak, ne’ebé hanaruk iha Kreda Don Bosco no Maria Domenica Mazzarello nia domin ba foin-sa’e sira, ba ki’ik sira no ba kiak sira.

Ohin mak loron memória nian no loron futuru nian, hanesan akontese iha loron 5 Agostu 1872, tinan 141 liubá. Loron gratidaun nofidelida nian.

Mensajen ne’ebé festa ne’e oferese mai ita sai preparasaun ida ba selebrasaun  karizma salezianu ho karakterístika feminina ba 25 iha Timór: “ita keta kolen atu fila fali ba bee-matan, atu halakon ita-nia hamrook sira husi bee-matan fresku karizma nian”.

Ita fila fali ita-nia bá pátria loos fuan nian: Mornese iha-ne’ebé ita-nia futuru tau nia abut. Hodi tau metin abut iha rai Mornese mak karizma sei kontinua atu fó fuan iha realidade Timór-Indonesia.

Festa loron 5 Agostu nian no selebrasaun tinan 25 nian mak bolun ida atu halakan fali don ne’ebé horik iha ita: murak ita-nia vokasaun saleziana!

Iha loron foun 5 Agostu ida-ne’e ne’ebé prepara ita ba ita-nia jubileu, ita hafoun “sin” nakonu ho domin no laran-luak iha komuñaun ho foin-sa’e sira ne’ebé tama Novisiadu, ho sira ne’ebé halo votus ba dala uluk, ho sira ne’ebé halo votus ba nafatin loron 15 Agostu 2013, ho ita hotu. Sentidu ita-nia ezisténsia nianno ninia fekundidade nia fundamentu mak “hela metin ho Uvas-Hun” atu fó fuan. Fuan ne’ebé Institutu iha Timór-Indonesia simu bolun atu fó soi marka “espíritu Mornese nian”.

Hodi sai fiél liután ba ita-nia vokasaun FMA nian, hodi halo ita-nia moris sai uvas-sanak metin ba uvas-hun, ita sei sai sanak fekundu, sei fó fuan, fuan ida ne’ebé hela ba nafatin! Jezús nia prezensa iha ita, hanesan kbiit vitál,  hakonu ita-nia fuan ho konfiansa ida aten-barani nian mai husi ema ne’ebé la sukat nia ain-hakat ho ninia forsa rasik maibé ho ida Na’i nian no ho Maria Inan no Edukadora.

Ohin mós, loron vijília 5 Agostu nian, ha’u simu komunikasaun husi Roma katak ba selebrasaun tinan 25 prezensa FMA nian, sei mai nu’udar Madre Jerál nia reprezentante, irmán Piera Cavaglià, Sekretária Jerál iha Institutu! Ita agradese Maria ba don boot ne’e!!

BOA FESTA no hamutuk ita hananu ba Maria ita-nia Magnificat!!!

 

Ho domin Ir. Paola Battagliola