Palla/Sumba (Indonesia) – Iha loron 19 Novembru 2017, Loron Mundiál ba Kiak sira ho nia tema: “Keta hadomi ho lia fuan de’it  maibé ho hahalok no lia loos”. Tuir buat ne’ebé Amu-Papa Francisco husu, ami iha komunidade rua iha Sumba (Palla no Bondo  Kodi) halo vizita ba maluk sira ne’ebé kiak iha Stasi.

Iha loron Sábadu loraik Sr. Lanny, Sr. Dominingas, Sr. Martinha no Sr. Noemia ba vizita  Ibu Paulina Pandaka  iha lingkungan III, iha loron domingu, Sr. Aurea no Sr. Noemia ba Stasi Lingo-Lango vizita família tolu; ferik no katuas, labarik ne’ebé cacat, no senhora ne’ebéhetan pendarahan. Sr. Olviana no Sr. Domingas ba Kiko-Boko ba vizita família rua,  no  Sr. Ligia no Sr. Martina ba Wepewa vizita família rua. Ami bá hamutuk ho pembina Sekami  no labarik Sekami sira, hodi lori ba sira buat ruma ne’ebé sira presiza, hanesan hahan uituan no sasán sira ne’ebé uza ba hamoos-an. Ami lori buat uituan ne’ebé ami  iha no ami nia-an hodi ba reza hamutuk ho sira, dehan ba sira ami-nia intensaun ba vizita sira no rona sira. Sira simu ami ho ksolok no agradese ba ami-nia prezensa iha sira nia fatin.

Ami fó uituan maibé buat ne’ebé ami  simu barak liu fali. Haree ba sira nia realidade iha ambiente riku ho paizajan ne’ebé furak, matak no malirin fresku halo  ami hahí no agradese tebes  Maromak ba diak sira ne’e. Haree ba ema  sira ne’e nia realidade terus no susar nian halo ami aprende atu simu difikuldade sira ho ksolok tamba hare katak iha ema seluk ne’ebé hetan terus boot liu. Maromak di’ak tebes. Nia uza meiu oi-oin atu halo ita konxiente.

Ho esperiénsia ne’e hariku tebes ami no tulun ami atu sai laran manas liután atu sai ba li’ur hasoru maluk sira ne’ebé hein hela ami. Ami mós agaradese tebes ba komunidade ne’ebé fó ba  ami oportunidade atu bele halo esperiénsia furak ne’e. Mai ita reza ba ita nia maluk sira ne’ebéhetan susar no terus atu Maromak hakmaan sira nia todan sira ne’e.

(Lanny Ganda)