Venilale – Atu selebra Loron Mundiál Ema-Kiak sira-nian Dahuluk ne’ebé Papa Francisco estabelese iha Domingu XXXIII ohin, 19 Novembru, Irmán FMA no foin-sa’e sira hola parte ba Komunidade Edukativa (KE) Madre Mazzarello sai ba periferia atu vizita ema sira ne’ebé moras, mesak no iha nesesidade oioin. Ida-nee’ tanba ita hakarak atu «la hadomi ho liafuan maibé ho hahalok» (1 Jo 3,18).

Grupu oioin iha KE palnu ninia vizita. Grupu Don Bosco vizita horisehik hodi sai husi Venilale bá Ossú (tk2-6 loraik). Maski udan no anin, maibé ho espíritu juveníl, ho laran-manas hamutuk ho Me.Titta ami la’o. Tuir dalan ne’ebé naruk, udan boot, rai namdoras no monu ami-nia viajen sai aventura ida liután. Husi bokon ba maran, husi monu ba hamriik, tulun malu no suporta malu nafatin, ho Na’i ne’ebé akomaña no Na’i-Feto, ami to’o duni iha fatin hanaran Bubulale-Eli hodi vizita família ki’ik ida, iha-ne’ebé inan família nian moras (sra. Ludovina Maria Carvalho).

“Iha mundu laiha ema ida riku, Ita hotu mesak kiak, tanba ita presiza malu husi moris mai to’o ita mate. Maromak de’it mak riku tanba nia mak moris, no haraik mai ita moris ne’e” (Me. Titta). Liafuan sira-ne’e sai inspirasaun tebes. Tanba ne’e la iha ema kiak ida ne’ebé labele fó netik buat ruma, lolo netik nia liman ba nia maluk ne’ebé presiza. Tia Ludovina ami-nia maluk ki’ik ida ne’ebé ami ho espíritu Don Bosco nian ami bá vizita. Tia Ludovina hakfodak ho ami-nia prezensa. Ami-nia prezensa midar nu’udar Aman Maromak nia liman ba ema seluk. Orasaun agradesimentu nian ba Maromak liuhusi Na’i-Feto mak hafahe ami. Sai husi Bubulaleli mai fali Venilale dalan naruk ho obstákulu ida tan mai ami, tanba ami la hatene dalan atu fila husi dalan seluk. Ami-nia belun ida gia ami maibé susar tanba nia mesak. Maibé ami la lakon ksolok tanba hanesan iha ksolok boot liu atu fó duké obstákulu sira, La’o husi foho lolon, ai-larn boot, sae no tun foho ho “sangue-chuga” ne’ebé susu ami-nia raan. Hamutuk ho Me. Titta ami hanesan bibi-luhan ida ho ninia pastora ida. Maski monu, kolen, maibé nia espíritu laran-manas inspira ami hodi la’o. Natureza ninia furak hale’u ami iha ami-nia viajen, la’o hamutuk ho Don Bosco, Na’i-Feto no Maun Jezús, ami to’o duni ami-nia objetivu no susesu iha ami-nia misaun.

Grupu sira seluk halo sira-nia vizita halo iha loron domingu 19 Novembru loraik: grupu  hamutuk ho Ir Yasintha ba vizita Avó Domingas ho idade 85  kondisaun saude ne’ebe ladi’ak no  kiak  iha Kaikoli-Venilale. Grupu Animadór/a siraho Ir ‘Aurea Freitas bá vizita uma-kain haat iha Fatulia. Grupu Laura ho Maria Mazzarello hamutuk ho Ir Libanha no Ir Fabiola bá Uaitobonu hodi vizita avó feto ida ne’ebé hela mesak. Grupu Marianu hamutuk ho Ir Maria Natalina bá vizita uma-kain tolu tolu iha Uaitalibu.

Hotu-hotu haksolok bele moris tuir Amu-Papa Francisco nia lia-menon atu liuhusi “karidade, solidariedade, integrasaun, akollimentu ba ema kiak nia hakilar sira, “hodi kolabora ho modu ativu ho sira, atu tulun sira sai husi pobreza no realiza forma moris nian ne’ebé soi ba ba ema nia dignidade”.

(Auxilia Esperança de Jesus – Grupu Don Bosco no animadora)