Primeira profisaun relijioza iha Institutu FMA

Dili – Iha loron aniversáriu da-141 fundasaun Institutu FMA nian, ohin 5 Agostu, Provínsia FMA Timór-Indonesia, haksolok ho primeira profisaun novísia na’in tolu nu’udar FMA: irmán Aida Belita Moises, irmán Ermelinda de Almeida no irmán Domingas Santos de Deus, ba tinan ida.  Iha profisaun relijioza ema ida saran nia an nu’udar karan totál ida ba Maromak, tama iha aliansa domin nian ho Maromak hodi promete fidelidade moris iha votus kastidade, pobreza  no obediénsia.

Tuir Konstituisaun FMA nian husi votu dahuluk, irmán sira sei hafoun tinan-tinan ba tinan haat tutuir malu, no tuir mai ba tinan rua, hafoin ba nafatin, maski iha mós oportunidade bainhira presiza, atu hanaruk to’o tinan 9 nu’udar irmán ho votu temporáriu (artigu 95) molok profisaun perpétua.

Selebra Eukaristia profisaun nian hahú tuku 10 dadeer,  no amlulik na’in 8 mak konselebra: SDB na’in lima no diosezanu na’in tolu. Padre Apolinário Neto, vigáriu provinsiál SDB mak prezidente asembleia nian. Iha ninia omilia, nia foka liuliu kona-ba vokasaun, hodi dehan karak “vokasaun mak moris tuir Maromak nia planu husi bainhira ita simu batizmu atu fó sasin ba Maromak, nu’udar profeta, liurai no na’i-lulik”.
Vokasaun moris iha família, família sai kolaboradora ba Maromak nia bolun espesiál vida konsagrada no amlulik nian. “Ita agradese família nia kolaborasaun tanba ho ne’e mak ita bele selebra profisaun ohin. Inan-aman entrega oan sira atu tuir Jezús nia ain-fatin tanba domin ba Nia no tanba hadomi Kreda”, padre Apolinário hateten. “Maromak bolu ema hotu, maibé balun de’it mak halo desizaun radikál atu tuir Na’i, fiar metin no horik iha Jezús no ninia Liafuan, maski hasoru dezafiu no difikuldade oioin, no ita metin tanba ita harii iha Jezús”, nia hatutan.

Iha ninia omilia padre Apolinário agradese mós misionária sira ne’ebé tinan 25 liubá lori karizma FMA mai kuda iha Timór. Iha tinan 25, iha FMA rai-na’in 85, no ne’e razaun atu agradese Maromak ba fekundidade vokasionál ba foin-sa’e sira nia di’ak.

Iha finál selebrasaun nian irmán foun sira mós hato’o liafuan agradesimentu ba don vokasaun nian no ba formadora no ema hotu ne’ebé akompaña sira iha sira nia formasaun to’o etapa ida-ne’e, hodi fó sira-nia “sin”. Aleinde ne’e, irmán Paola Battagliola, provinsiál FMA TIN, hato’o mós ninia agradesimentu ba hotu-hotu prezente iha festa ne’e, selebrante sira, inan-aman no familiár sira, relijioza sira no belun hotu. Nia konvida ita hotu atu “kontinua akompaña irmán Aida, irmán Ermelinda no Domingas ho ita-nia orasaun no domin atu sira kontinua tau sira-nia laran-metin iha Ida-Ne’ebé sira hili nu’udar ‘fatuk-murak’ ba sira-nia moris tomak”. Ba sira na’in tolu nia konvida atu entrega sira-nia “sin fidelidade nian ba Maria, feto fiél ba Maromak nia domin” atu kontinua hafoun domin ida-ne’e iha moris loroloron. “Keta ta’uk – nia enkoraja sira – Maromak la husik imi, Nia nafatn la’o hamutuk ho imi iha momentu susar no ksolok nian, no ami mós akompaña nafatin imi ho ami-nia domin no orasaun”, hafoin konklui ho liafuan “parabéns”.

Selebrasaun taka ho konvíviu hamutuk to’o tuku 1.15 loraik, iha Centro João Paulo II. Marka prezensa ema besik atus lima nune’e.