Amu-Papa iha Angelus 4 Agostu 2013 iha Prasa S. Pedro

 

Sidade Vaticano – La’ós de’it ahi-funan (fireworks) lakan iha momentu ida, maibé etapa dalan ida nian. Papa Francisco klarifika sentidu eventu Jornada Mundiál Juventude nian iha Rio de Janeiro. “Ita keta haluha katak Jornada Mundiál Juventude nian la’ós “ahi-funan”, momentu ida entuziazmu nian ho finalidade ba an rasik; sira mak etapa dalan naruk ida nian, hahú iha 1985, inisiativa husi Papa João Paulo II.

Nia entrega Krús ba foin-sa’e sira no hateten: imi bá, no ha’u sei bá ho bá ho imi!” Foin-sa’e sira tuir Jezús no laós Papa ne’ebé ho sira “gia sira no akompaña sira iha dalan fiar nian no esperansa nian”. Francisco husu atu joven sira “bele tradús esperiénsia iha sira-nia dalan loroloron nian; no bele tradús mós iha hilin importante sira moris nian, hodi hatán ba Na’i nia bolun pesoál”.

 

Nia fó hanoin foin-sa’e sira atu atensaun ba “loko-an” eh vaidade hanesan leitura dahuluk ohin nian haktuir, kuidadu ho “venenu sentimentu mamuk nian ne’ebé tama iha sosiedade bazeia ba lukru no soi sasán sira, ne’ebé lohi foin-sa’e sira ho konsumizmu”. Rikusoin loos mesak de’it mak “Maromak nia domin, fahe ho maun-alin sira. Ema ne’ebé halo esperiénsia ida-ne’e la ta’uk mate, no simu hakmatek fuan nian”.

Hafoin nia fó hanoin kona-ba festa Salus Populi Romani, Na’i-Feto nia festa (festa Nossa Senhora das Neves) monu iha loron 5 Agostu aban, no husu hotu-hotu iha Prasa S. Pedro atu harohan Ave Maria no basa liman ba Maria. Aban mós aniversáriu ba 141 fundasaun Institutu FMA nian, nune’e husi redasaun hato’o parabéns mós ba Institutu FMA ne’ebé oras ne’e namkari iha kontinente lima.

Hafoin, Amu- Papa hateten mós katak ohin memória patronu amlulik no pároku sira-nian: S. João Maria Vianney. “Maun-alin doben sira, ita hamutuk iha orasaun no iha karidade pastorál”, nia liafuan sira ba amlulik sira.

Ikusnian “hanoin ida nakonu ho gratidaun ba Paulo VI iha aniversáriu da-35 nia mate nian, iha loron 6 Agostu 1978, festa Transfigurasaun Na’in nian.