Selebrasaun resesaun medalla novísia nian, marka entrada iha novisiadu

Dili – Feto-raan na’in lima ohin, 4 Agostu simu medalla novísia nian iha Institutu FMA husi irmán Paola Battagliola nia liman, hodi kontinua sira-nia dalan formasaun. Sira-ne’e mak postulante Fátima, Onesiana, Josefa, Libania no Marta. Períodu novisiadu mak períodu inisiasaun loloos ba vida relijioza. Iha tinan hirak ne’e nia laran irmán sira hahú moris tuir Don Bosco no Madre Mazzarello nia vida komunitária no apostólika, hanesan Konstituisaun FMA haktuir, husik sira-nia an forma tuir Kristu nia ilas.

Nu’udar símbolu ba sira-nia dalan, novísia foun sira-ne’e hili ilas sanan-rai ne’ebé foti husi profeta Jeremias nia livru (18, 1-6). Iha leitura ne’e, Na’i lori Jeremias ba badaen sana-rai nia serbisu-fatin no hatudu oinsá tahu nia destinu iha badaen nia liman. Irmán Paola Battagliola iha ninia komentáriu ba leitura sira liturjia resesaun nian foka ba pasu sira ne’ebé badaen halo atu fó forma ba sanan-rai/vazu. Uluknanai, “badaen ba buka rai hodi lori ba ninia ofisina. Bainhira iha ona ninia serbisu-fatin, nia hahú ho serbisu purifikasaun nian. Tahu dala barak nakonu ho rai-henek, fatuk oan sira, du’ut nia tahan, ai-rahun no foer seluk rai ninian ne’ebé, molok hahú prosesu serbisu nian, presiza halakon uluk. Nune’e badaen-rai foti bee no fase nia”, irmán Paola hateten.

Fase tiha rai-tahu ne’e, hamoos tiha husi foer sira, “badaen hahú serbisu hodi fó forma ba nia, halo kabeer, no halo nia hanesan masa kabuar ida, hanesan halo masa paun nian molok hatama iha fornu”.   Irmán Paola hateten katak, uza modu tradisionál sira, halo tiha hanesan masa paun nian, badaen “tau nia iha fatuk belar ida nia leten no hahú baku didi’ak tahu ne’e, dala barak, tanba iha nia laran bele iha restu sira foer nian, kafuak ho ár/anin. Tanba se nia tau iha fornu molok hasai anin, sanan-rai/vazu bele nakfera”. Prosesu kontinua depoizde hasai ár, badaen hatama tahu iha roda ida ne’ebé dulas nia, enkuantu ho nia liman espesialista nian nia buka atu fó forma ba tahu. No se la konsege halo di’ak “nia hahú fali husi leten, halo sai masa, manipula, fó forma”, irmán Paola kontinua. Hafoin, hetan tiha forma ne’ebé badaen hakarak, nia hatama forma ne’e iha fornu laran, ho temperatura aas, atu “tunu nia no halo nia sai toos, habiit nia hodi halo sai forte, hamenus iha frakeza”.

Hotu tiha prosesu tunu nian, la’ós ona tahu mak sai husi fornu, maibé obra ida arte nian, halo tuir badaen ninia gostu.

Ba novísia sira no ba hotu-hotu, mensajen mak ne’e: “Maromak iha planu ida ba ida-idak nia moris; Nia hakarak halo obra partikulár ida ba ita-nia moris, hanesan badaen nee’ebé fó forma ba tahu no halo vazu la hanesan ba ida-idak… maibé ba sira ne’ebé tau an iha Nia liman de’it hanesan tahu iha badaen nia liman” mak Na’i bele hala’o nia obra to’o rohan no didi’ak. Maibé ita keta ta’uk atu husik Na’i molda ita, purifika ita. Ita-nia moris to’o rohan mak prosesu kontínuu iha dalan konfigurasaun ho Kristu, to’o oras ne’ebé ita to’o iha dalan nia rohan.

Iha serimónia ne’e, irmán Paola mós agradese irmán Alexandrina no komunidade ne’ebé akompaña foin-sa’e sira-ne’e nia formasaun iha etapa uluk no entrega sira ba irmán Cecilia del Mundo, mestra novísia sira-nian.