Dili – Iha loron 14 Novembru, loron ne’ebé Irmán sira Institutu Filhas de Maria Auxiliadora komemora tinan 140 espedisaun misionária Filhas de Maria Auxiliadora ba dala-uluk (14 Novembru 1887-14 Novembru 2017).  Komemorasaun ne’e Irmán sira selebra iha ida-idak nia komunidade tuir situasaun ou ambiente ne’ebé iha.  Iha komunidade Divina Providénsia selebra mós loron istóriku Institutu nian ida ne’e ho menina sira ne’ebé hola parte iha komunidade.

Selebrasaun aniversáriu espedisaun misionaria tinan 140 ne’e hahú ho triduu ne’ebé realiza iha loron 11 Novembru no remata triduu iha loron 13 Novembru. Iha loron komemorasaun nian (14 Novembru) komunidade halo selebrasaun espesiál ne’ebé envolve liután menina sira iha momentu orasaun nian. Durante triduu no komemorasaun ida ne’e, komunidade selebra hodi reza hamutuk ho menina sira iha tempu vésperas nian hafoin kontinua ho Rozáriu. Iha kada triduu iha mós istória badak husi Irmán misionária dahuluk sira nian. Liu husi triduu ida ne’e tulun Irmán no menina sira atu hanoin fali kona-ba  Irmán dahuluk sira nia laran-manas misionária ne’ebé buka atu  hatán nafatin ba Maromak Nia bolu ho radikalidade ne’ebé realiza husi obra no misaun ne’ebé sira hala’o iha rai misaun “Ad gentes” liuliu iha kontinente Amérika.

Istória haktuir katak misaun Ad gentes Irmán saleziana (FMA) nian hahú ho Irmán na’in 6 hamutuk ho Don Giacomo Costamagna SDB no Salezianu sira seluk. Irmán misionária sira  ne’e mak Ir. Angela Valese, Ir. Angela  Denegri, Ir. Angela Cassulo, Ir. Terezina Mazzarello, Ir. Teresa Gedda no Ir. Giovanna Borgna. Husi Irmán sira ne’e nia moris hatudu katak sira mak konsagrada sira fiar-na’in ne’ebé iha aten-brani no audásia atu bá hasoru situasaun foun ho kultura ne’ebé diferente. Korajen ne’ebé sira iha mak mai husi sira nia konfiansa tomak iha Na’i ne’ebé hili sira atu hatutan Nia misaun iha kontinente ne’ebá no mós tanba sira hetan konfiansa husi Fundadór  no ko-fundadora (Don-Bosco no M. Mazzarello).

Liuhusi selebrasaun ne’ebé hala’o tulun Irmán sira no menina sira atu reza litán ba misionária sira no mós atu haburas laran-manas misionária nian hodi hala’o knaar ne’ebé simu ho di’ak no responsabilidade. Ikusliu iha selebrasaun ida ne’e, Ir Veronika ho Irmán sira prepara símbolu ki’ik ruma nu’udar rekordasaun ba ema ida-idak. Iha momentu ida ne’e Ir Veronika husu atu ema ida-idak bele sai misionária ba malu liuhusi knaar ne’ebé hala’o loron-loron ho di’ak.

(Miranda Cruz)