Palla / Sumba (Indonesia) – Selebrasaun aniversáriu ba 140 Espedisaun Misionária dahuluk iha Inspetoria FMA-Timor/Indonesia hahú ho selebrasaun loron gratiduan inspetoriál iha fulan Setembru bainhira komunidade edukativa sira hakle’an espedisaun FMA ba kontinente lima. Ninia tutun mak abertura komunidade foun iha Bondo Kodi (Sumba) ho Irmán sira ne’ebé disponivel atu bá rai ida-ne’e nu’udar misionária. Irmán na’in tolu ne’ebé simu obediénsia atu bá mak Ir Domingas, Ir Noemia no Ir Martinha. Sira sai husi Timor iha loron 13 Novembru, loron komemorasaun Madre Mazzarello nian no to’o iha Sumba iha loron 14 Novembru, loron aniversáriu ne’e.

Tuirmai ne’e, Irmán sira nia lia-menon:

“Ho fuan nakonu ho agradesimentu ba Aman Maromak laran di’ak no laran luak wain, ba grasa no di’ak tomak ne’ebé Nia haraik mai ita nia Institutu no ispetoria. Iha loron 14 Novembru 2017, iha komunidade MM Palla selebra  Aniversáriu ba 140 espedisaun Misionária dahuluk FMA nian no abertura komunidade Madre Angela Vallese Bondo Kodi ho solene. Ho fuan nakonu ho ksolok Misionária nian, halo ami hotu partisipa ho laran manas iha selebrasaun ida ne’e. Ami sente katak ami mak Madre na’in neen ne’ebé iha  tinan 140 liubá ne’ebé rona rasik ho sira nia tilun Amu -Papa Pio IX nia Audiénsia ne’ebé  dehan: “Imi sai hanesan kontentór bee-matan sira-nian, ne’ebé simu bee no hasuli hikas fali ba hotu-hotu nia di’ak: kontentór virtude no matenek nian…  Hanesan inan teb-tebs, atensaun lais no domin-na’in, imi sei halo di’ak barak” [«Siate come le conche delle fontane, che ricevono l’acqua e la riversano a pro di tutti: conche di virtù e di sapere… Da vere madri, sollecite e amorose, farete molto bene... »].

No  DB nia liafuan wainhira entrega regulamentu ba Irmán sira: Foti livru ne’e ba estuda iha memória: lori regra sira ne’e ho imi nafatin no halo sai norma ba imi nia hahalok. Imi  agradese  ba ema hotu ne’ebé halo di’ak ba imi. Imi dehan ba sira katak iha ne’e, iha igreja ne’e, sei reza ba sira. Iha ne’eba iha sarani sira ne’ebé hein imi ho entuziasmu, iha ne’eba iha Salezianu sira, iha foin sa’e sira seluk ne’ebé sei rona imi ho ksolok, no sira rasik la iha ona pasiénsia atu haree no hakohak imi. Iha ne’ebá to’os  boot hein imi no imi sei hetan konsolasaun sira ne’ebé halo imi haluha imi nia kole sira. Imi bá ho  aten-barani. Bele akontese katak imi sei fila fali atu hare uma ne’e,  imi nia rai, parenti  sira, imi  nia belun sira, maibé la’ós hanoin ida ne’e mak tenke gia imi.

Imi lalika hanoin buat seluk, aleinde soi klamar sira ba Maromak. Ha’u husu ba imi reza mai ami, ami mós sei reza ba imi atu Maromak haraik bensan ba imi nia servisu” (MB XIII, 317).

Lia-fuan sira ne’e fo mai ami korajen no konsolasaun boot iha misaun foun ne’ebé ami simu no hala’o. Ami fiar katak ami la mesak tanba iha Maria Auxiliadora ne’ebé nafatin la’o hamutuk ho ami, no Irmán sira hotu ne’ebé nafatin hanoin ami iha orasaun loron-loron nian. Hanoin ida ne’e halo ami sente seguru liután atu sai “Misionária Ksolok no Esperansa nian” ba ema hotu ne’ebé ami hasoru iha Misaun Sumba liuliu iha Palla no Bondo Kodi espesialmente foin-sa’e no labarik kiak sira. Reza nafatin mai ami atu iha fatin hotu ne’ebé ami bá no ema hotu ne’ebé ami hasoru, ami bele sai fini hariinia no instrumentu ksolok no esperansa nian. Ita reza ba malu. Obrigada barak”.

(Irmán FMA sira iha Sumba)