Iha 14 Novembru 1877 husi Portu Genova nian bá primeira espedisaun misionária foin-sa’e FMA sira-nian. Ir Angela Vallese (tinan 23) bá Amérika ho grupu oan ida Irmán sira-nian: Giovanna Borgna (17 anni) Angela Cassulo (tinan 25), Angela Denegri (tinan 17), Teresa Gedda (tinan 24), Teresina Mazzarello (tinan 17), hamutuk ho padre Giacomo Costamagna sdb no salezianu sira seluk. Ita ba hanoin uitoan momentu istóriku ida-ne’e, ne’ebé marka ita-nia identidade karizmátika.

Madre Mazzarello no Irmán na’in rua husi Mornese ba Roma

Madre Mazzarello, nu’udar Superiora Jerál Institutu FMA tenke akompaña Irmán misionária na’in rua atu bá Roma hasoru Amu-Papa.

Sira halo viajen husi Mornese ba iha Sampierdarena no husi ne’ebá bá hamutuk ho salezianu iha Roma.

Iha kalan Madre Mazzarello no Irmán sira toba ho feto sira ne’ebé fase ropa no tein iha kuartu bainaka nian, sira  simu no serbi sira ho di’ak.. Ksolok boot ba Ir. Vallese tanba hetan padre Cagliero, ne’ebé nia seidauk haree wainhira nia fila husi Amérika.

Iha han-kalan, sira konkorda kona-ba viajen ne’ebé sira sei halo, Madre Mazzarello dehan ba Padre Cagliero: “Señor diretór, ita-boot hanoin saida, katak ha’u ba Roma no ida-ne’e sei  la halakon estima ba Institutu? Santu Padre, fiar katak nia sei haree, Superiora Jerál nu’udar Irmán ida matenek, edukada, maibé  lae nia sei hasoru ema ki’ak no beik ida”. Padre Cagliero, hamnasa midar ho sira, depois nia hatán ba Madre katak tenke bá. Depois nia dehan ba Irmán na’in rua no hirak ne’ebé prezente, no mós padre Costamagna no padre Paolo Albera, diretór uma nian, hodi ko’alia neineik: “Ita aprende lisaun ne’e”.

Iha dadersan sira ba Roma ho padre Giovanni Cagliero.

Hein no to’o iha Sampierdarena

Iha loron 12 Novembru 1877 kalan ho komboiu sira fila fali ba Genova no iha loron 13 sira ba iha  Sampierdarena. Sira ne’ebé husi Mornese seidauk to’o, madre tauk tanba karik iha buat ruma.Maibé finalmente sira mós to’o akompaña husi madre Emilia Mosca, no madre Enrichetta Sorbone.

–              Tanba sa mak ami to’o tarde? “Loloos ami to’ot hodi kalan, maibé husi dader kedas, neve makaas, la’o labele, no labale haree buat ida,  depois udan mós la para, estrada sira bee nakonu la’o labele no hetan estrada, ikus iha anin makaas liu, nune’e ami labele halo buat ida. Madre Petronilla no diretor sira lakohi atu ami sai.

Tanba tempu liu dadaun ona, nune’e buka “kareta-kuda” ida- pelemenus to’o iha Ovada, atu ohin dadersan bele mai lalais.

Maibé laiha ema ida hakarak tanba tempu ladi’ak, selu mós lakohi hotu; sira dehan katak ita ba atu mate de’it.  Maibé ami tenke ba duni, pelomunus la’o iha kalan. Imi hanoin took, Madre ekónoma halo saida? Nia impresta karosa karau nian lori mai iha varanda, hafoin bobar didi’ak ho korente boot ida iha karosa halo hanesan tenda boot ida, nia suku didi’ak no taka metin duni no halo trigu kain nu’udar kadeira hodi tur, nakdoko no monu tun monu sae de’it, ne’e estilu foun ida ne’ebé nunka haree iha moris, ami kuaze monu sala-sala de’it, tan nunka koko.  Tanba ne’e ami balun hanesan foin mak sa’e Noé nia arka foun; balun fali halakan lampu no hahú hananu ino ba Na’i-Feto, ami tur haleu iha karosa  laran hein atu viajen.  Ne’e mak rekreiu furak nian, ne’ebé halo iha kalan espesiál ne’e, kontinua to’o tuku 10.30 kalan, lahó buat ida.Depois tun fali ba reza no sira deskansa hotu ona. Nune’e ami mós ba deskansa oras ruma. Udan tau la para no diretór lahatene atu halo desizaun oinsá.  Karosa karau ne’e mós a’at  liu ona, labele sai iha tempu ida hanesan ne’e. Bee nakonu estrada labele haree buat ida, no haree katak se bá ho karosa ne’e, karau mós la’o neineik liu, siguru ona katak sei la toman komboiu.

Hafoin sekretáriu Traverso to’o, ne’ebé hatene katak ami halo moe an, nia oferese ninia kareta karosa ki’ik hodi lori iha dadersan nakukun, hatene katak ba Madre ida ne’ebé labele la’o ona, karosa ne’e ba sira buat boot ona.

Ami hadeer iha kalan boot no ba iha kapela atu reza no simu komuñaun. Lalakon tempu. Udan nafatin, maibé la dun boot hanesan uluk; ho silénsiu ami kumprimenta ami-nia uma no Mornese, no simu tan bensaun husi diretór, hafoin ami halakan lampu no sai husi uma, la’o dadaun.

Kooperadór salezianu di’ak ida mai hasoru ami no dehan: “Ha’u iha ne’e atu akompaña ita-boot sira.  Imi keta tauk; no señor diretór mós hakmatek bá: Kona-ba estrada ha’u prátiku liu, no ita sei to’o, laiha perigu.

Ami mai ho Saun Arkanju Rafael foun, tebes duni, nia prátiku liu no seguru, no dadeersan nakukun ami to’o duni.

Tebes duni, kooperadór salezianu sira di’ak liu! Madre dehan ba Don Bosco, sira tulun liu ami, sira halo passporte no fó gratis ba iha Novi no Genova.

Hotu-hotu hein misionariu sira iha sala no Don Bosco ne’ebé atu to’o dadaun ona;  no Irmán sira preokupa hadia sira nia sasán ba misa no ba viajen.

IMAJEN MARIA AUSILIADORA NIAN BA HO MISIONÁRIA/U SIRA

Molok padre Castamagna sai husi Mornese, kuadru  Maria Ausiliadora ne’ebé iha Kapela lakon tiha ona, kuadru ne’e Padre Pestarino mak fó mai ami no Don Bosco mak fó bensaun ba ninia kapela ki’ik.

Ne’e mak imajen ida entre imajen sira ne’ebé reproduz husi ilas Na’i-Feto Valdocco nian, Inspiradora divina obra saleziana nian.  Hotuhotu hanoin katak karik diretór lori ona ba iha uma Carante atu konsola an tan terus atu bá ona, no karik sei lori fali mai. Maibé Pe Costamagna fó ba Ir. Teresa Mazzarello no dehan ba nia atu labele fó ba ema seluk, maibé wainhira too iha Amérika fó fali ba nia. Nia lori ba ninia destinasaun foun nu’udar don husi Mornese. Sé mak bele prevene nia?

Iha parte ida, Irmán misionária sira mós haksolok liu hodi lori imajen ne’e ho sira nu’udar rikusoin no rekordasaun, kuaze kbiit ida.

Liu uituan, sira haleu hadulas superiór sira, iha momentu ikus adeus nian, Pe Cagliero lori tan imajen dezeñu furak Maria Ausiliadora nian iha hena ida, iha-ne’ebé Nia kous iha liman labarik ida ho hamnasa midar. “Nia na’ok husi sakristia Valdocco nian –  nia koalia ho halimar dehan: Ha’u na’ok husi Sakristia Valdocco nian –  Ha’u na’ok ba imi. Señor ida mak halo dezeñu ne’e tan nia terus liu, nia matan kuaze delek ona. Nia halai ba Don Bosco no nia matan di’ak fali, nune’e nia halo dezeñu ne’e no lori ba Don Bosco hodi fó bensaun. Nia agora sai di’ak liu ona, no nia fó Na’i-Feto furak ne’e mai.

Nune’e kuadru ne’e milagrozu: maske haree de’it fó ksolok ona!  Don Bosco fó bensaun dala ida tan, hafoin fó ba misionáriu sira, dehan: “Lori ho imi bá, Na’i-Feto haraik bensaun ba imi no akompaña imi iha viajen naruk”.

DON, BENSAUN SIRA NO MATAN-BEEN ADEUS NIAN

Tempu atu deskansa, kuartu ne’ebé sira toba iha loron ruma, ba hirak ne’ebé ba Roma, ne’e to’o ba ema na’in sia. Iha kama rua de’it; maibé sira tau kulxaun rua tan iha rai no sira hotu toba iha kuartu ida de’it, sira hasai  ábitu no sapatu de’it. Ema ida la toba: tan oras ikus-ikus ona sira bele hela hamutuk.

Iha dadeer kuarta loron 14, dadersaan liu Don Bosco selebra misa no rona konfisaun husi misionáriu/a sira nu’udar absolvisaun ikus no rekordasaun ikus nian ba sira.

Irmán Giovanna Borgna, sai husi kapela ho matan-been, dehan ba grupu ne’ebé sei reflete no iha silénsiu hela: “Don Bosco dehan mai ha’u nune’e: Tau iha imi neon, imi bá iha Amérika atu funu hasoru salan”. Hafoin imi reza dala tolu ba anju-mahein, loroloron iha imi-nia viajen tomak, nune’e to’o iha imi-nia destinasaun. Tuir imi-nia hanoin ida-ne’e la’óspeniténsia ida furak liu ba ha’u-nia salan

Iha li’ur sei udan no anin boot hela, maski nune’e tuku 9.30 Irmán no salezianu sira iha ona roo laran. Madre Mazzarello haree  fatin ida-idak no kuartu ida-idak hodi asegura katak buat ida lakuran ba Irmán sira iha sira-nia viajen naruk. Iha nia fuan sente katak prezisa atu fó an no fó an ba oan sira, hanoin katak sei laharee tan ona sira, ko’alia ho sira ida-idak, ko’alia ho sira hotu hamutuk, tulun sira no gia sira ba Don Bosco, atu nia ko’alia tan ho sira ida-idak ho liafuan efikás no ne’ebé bele fó inspirasaun ba sira. Don Bosco hamnasa midar, nia ko’alia, fó konsolasaun, padre Cagliero fali buka atu fó ksolok ba sira hotu maski iha momentu adeus nian, nia neon nakraik. Maske nune’e tenke tun duni. Dehan beibeik ona katak sira ne’ebé la halo viajen tenke sai husi salaun: presiza obedese.

Salezianu no Irmán sira hakneak haleu Don Bosco, no Aman foti sa’e nia liman hodi haraik bensaun ba sira. Sira triste tanba laiha mákina fotográfika, maibé padre Costamagna dehan katak wainhira sai husi Mornese ema ida propoin ona ba nia atu hasai Irmán misionária sira-nia foto, “Sin, sin, husik ona bá, wainhira ita tama ona iha okos metro 5 mak ita sei halo”.

Don Bosco nia matan-been  nakonu, nia fila kotuk tiha ba sorin hafoin hamaran atu sira labele haree nia tanis maibé matan been la para, to’o nia liman mós nakdedar, atu tau fali nia lensu ba bolsu, la di’ak no lensu monu ba rai. Nune’e Irmán Borgna, lalais liu, nia fó fali ninia lensu ne’ebé suku foun ba don Bosco, no nia rein lensu habokon husi aman nia matan been ne’e: nia hatene katak ne’e mak matan been sira santu nian. Lensu ne’e sei hamaran matan-been sira iha Amérika.

Madre Mazzarello mós fó ninia adeus ikus nian: Irmán sira hakilar ho lian maka’as dehan: “Madre, Madre!” maibé Madre halai bá tiha ona eskada okos, nia tau ona nia ain ba iha bero ki’ik iha-ne’ebé Irmán na’in rua hein hela nia atu fila. Ami tur hotu no haree tasi luan no laloran maka’as, no anin hu’u forte liu nune’e hu’u monu tiha Don Bosco nia xapeu, di’ak mak,  Madre Emilia, fó atensaun ba superiór sira-nia movimentu ida-idak, nune’e nia halai lalais ba foti tiha kedas molok bee

Husi ponte grupu kumprimenta. Don Bosco fila oin ba sira hodi hateke tuir kle’ur; Madre Mazzarello kontrola ninia matan-been. Padre Cagliero buka hodi halimar ho sira atu labele triste maibé labele tahan mós.

HA’U HAKARAK HADOMI MARIA

Iha momentu ruma laloran tarutu maka’as  to’o sira hotu rona. Padre Costamagna ne’ebé akompaña misionária sira hahú hananu: “Ha’u hakarak hadomi Maria.”  Hafoin sira la rona tan laloran nia tarutu. Rekordasaun midar nian! Loron sira ne’ebá padre Costamagna hakerek knananuk ne’e wainhira sei iha Mornese. Iha uma Carante laiha instrumentu nune’e nia ba iha sakristia, hodi koko no repete kona-ba armonia, liuliu nota dahuluk sira, ne’ebé nunka sai di’ak. “Ha’u hakarak hadomi Maria”…iha uma laran hotu rona, iha laboratóriu ami labele rona malu nune’e tenke hakilar de’it.  Madre, ne’ebé servisu no ko’alia ho novisa no postulante sira tenke troka fatin dalabarak; maibé ho refraun “Ha’u hakarak hadomi Maria” kuaze dada nia atensaun maka’as. Nia dehan ho pasiénsia: “ imi ba dehan ba señor diretór katak la’ós nia de’it mak hakarak hadomi Maria, maibé ami mós hakarak hadomi nia. Nia halo di’ak!”

(Lucia Pereira)