Baucau – Loron 5 Novembru, komunidade St. Teresa D’Ávila – Baucau selebra festa agradesimentu komunidade nian ho tema Nu’udar família ita agradese ba Misionária sira. Festa ida ne’e selebra hamutuk ho grupu sira ne’ebé eziste iha komunidade ida ne’e; (Komunidade Edukativu, Adma, infansia Misionaria, grupu LV. no oratorianu sira hosi Teulale & Diwake) inklui mós ho inan aman sira hamutuk 180.

Objetivu hosi festa ida ne’e mak atu agradese Maromak ba buat di’ak hotu ne’ebé simu liu hosi serbisu hamutuk durante tinan ida ne’e nia laran. Liu- liu ba Ir. Sanzinha nia prezensa iha komunidade nu’udar animadora nune’e mós nu’udar inan no sentru unidade ba grupu sira ne’ebé pertense ba komunidade ida ne’e. Liu hosi festa ne’e, nu’udar familia agradese ba misionaria sira   tinan140 espedisaun misionaria dahuluk FMA sira nian iha rai Uruguay.  No ikus liu agradese ba Ir. Martinha ne’ebé sei muda fali ba rai Bondokodi- Sumba.

Festa ida ne’e hahu ho atraksi liu hosi drama, dansa no knananuk ne’ebé prepara hosi grupu oratoriu no infansia misionaria. Molok aprezenta drama Ir. Sanzinha fó lia menon ba ema hotu ne’ebé prezente katak; “ festa ida ne’e ita selebra tinan-tinan maibé objetivu mak atu ita agradese  Maromak nu’udar familia ida ba buat di’ak hotu ne’ebé ita simu no ba tempu ne’ebé Maromak fó mai ita atu kolabora hamutuk hodi tulun malu iha dalan santidade nian”.

Depoizde atraksi, kontinua ho Selebrasaun Eukaristia ne’ebé Pe. Agnelo Moreira,SDB mak selebra. Iha homilia bazeia ba evanjellu domingu nian ne’ebé dehan: iha mundu ema keta bolu imi aman, mestre no doutor basá imi Aman ida deit mak Aman lalehan, imi nia doutor no mestre mak imi nia Mesias Jezús Kristu. Ho ne’e padre hateten katak ema ne’ebé hatene agradese mak ema ne’ebé hatene haraik-an hodi konxiénte katak nia ema fraku ne’ebé presiza ema seluk atu bele dezenvolve nia an. Ema ne’ebé hatene agradese mak ema ne’ebé iha ninia fuan laran iha deit domin laiha buat seluk hodi halo buat hotu atu ema koñese no hadomi Maromak la’ós nia an.

Hafoin nu’udar familia kontinua ho merenda hamutuk no fahe malu.

(Alice Gama)